گلبرگہ 26 ستمبر(پریس ریلیز/ایس او نیوز): نئے دور کی شدید ترین بیماریوں میں ذہنی دباؤ اور اس سے پیدا ہونے والے اثرات کو مہلک امراض میں شمار کیا جاتا ہے ۔ روز مرہ کی مشینی زندگی میں ذہنی دباؤ میں بہت زیادہ اضافہ ہوا ہے ۔ لیکن اس کو کیسے کم کیا جائے اس پر غور کر نے اور اس سلسلے میں کوشش کرنے کی ضرورت ہے ۔ ان خیالات کا اظہار ڈاکٹر عرفان مہا گا وی ماہر نفسیات نے اساتذہ کے لئے منعقد پروگرام ذہنی دباؤ کا تدارک میں کیا۔ آپ نے مزید کہا کہ مسائل کے تئیں ہمارے روئیے اور اپروچ میں تبدیلی سے ذہنی دباؤ کو کم کیا جا سکتا ہے ۔نئے حالات کی قبولیت، منفی جذبات کو مثبت جذبات میں تبدیل کردیتی ہے ۔ آپ نے کہا کہ شکر گزاری کا جذبہ ذہنی دباؤ کو کم کر سکتا ہے ۔اطمنان سے نماز اور اذکار کا اہتمام ذہنی صحت کے لئے موثر ہے ۔ذہنی دباؤ کو کم کر نے کے لئے گھر والوں سے بات چیت، لہجے میں نرمی، مثبت نکتہ نظر، کاموں کی منصوبہ بندی، خود کے لئے وقت دینا، خوش رہنا ضروری ہے ۔
اس سے قبل جناب جعفر کاریگر صدر آئیٹا چیتاپور نے حمد پیش کی، جناب خالد پرواز صدر مقامی آئیٹا گلبرگہ نے افتتاحی کلمات میں پروگرام کے مقصد اور اہمیت پر روشنی ڈالی اور کہا حالیہ سروے کے مطابق 60فیصد اساتذہ بی پی، شوگر اور دیگر امراض میں مبتلا ہیں ۔ اسی لئے آئیٹا کرناٹکا نے صحتمند معلم-صحتمند تعلیم کے عنوان سے دس روزہ مہم کا آغاز کیا ہے ۔جناب احمد پاشاہ صاحب صدر کراٹا ضلع گلبرگہ نے کہا کہ آج کل اساتذہ پر ذہنی دباؤ میں اضافہ ہو گیا ہے۔اس لئے یہ عنوان بہت اہمیت کا حامل ہے ۔جناب اطہر با با سکریٹری گلشن اطفال اسکول گلبرگہ نے آئیٹا کے کام کو سراہا اور کہا کہ اس طرح کے کاموں وہ ہمیشہ تعاون کرتے رہینگے ۔ جناب نصرت محی الدین ضلعی صدر آئیٹا گلبرگہ نے اپنے صدارتی خطاب میں صبر اور شکر کی اہمیت واضح کرتے ہوئے ڈاکٹر عرفان مہا گا وی کا شکریہ ادا کیا اور اساتذہ سے التماس کی ان کے بہترین مشوروں کو اپنی زندگی کا حصہ بنائیں ۔ آخر میں جناب شمش الدین صاحب مقامی سکریٹری آئیٹا گلبرگہ نے مہمانوں کا شکریہ ادا کیا ۔اس پروگرام کی نظامت جناب محمد جاوید ضلعی سکریٹری آئیٹا نے بہترین انداز میں کی۔ اس پرگرام میں ڈاکٹرشنتوشی کلنکل سیکاٹریسٹ کے علاوہ اساتذہ کی بڑی تعداد شریک رہی