نریش گوئل بیرون ملک جانا چاہیں تو 18 ہزار کروڑ کی ضمانت دیں: دہلی ہائی کورٹ
نئی دہلی، 9 جولائی (ایس او نیوز/آئی این ایس انڈیا) جیٹ ایئر ویز کے فاؤنڈر اور سابق چیئرمین نریش گوئل کو بیرون ملک جانے کی دہلی ہائی کورٹ سے بھی اجازت نہیں مل پائی۔ لک آؤٹ سرکلر کیخلاف گوئل کی درخواست پر منگل کو سماعت کرتے ہوئے جسٹس سریش کیت نے کہا کہ موجودہ صورت حال میں عبوری راحت نہیں دی جا سکتی ہے۔ گوئل اگر بیرون ملک جانا چاہیں تو پہلے 18 ہزار کروڑ روپے کی ضمانت دیں۔ ایک دور میں ملک کی سب سے بڑی نجی ایئر لائن رہی جیٹ ایئر ویز دیوالیہ کے دور سے گزر رہی ہے۔گوئل کی درخواست پر عدالت نے مرکزی حکومت سے جواب بھی مانگا ہے۔ اگلی سماعت 23 اگست کو ہوگی۔ گوئل نے لک آؤٹ سرکلر منسوخ کرنے کی اپیل کی تھی۔نریش گوئل کے وکیل منندر سنگھ نے کورٹ میں دلیل دی کہ ان کے مؤکل کے پاس برطانیہ کا ریجی ڈینس ویزا اور یو اے ای کا ریجی ڈینس پرمٹ ہے۔ یہ 10 جولائی اور 23 جولائی کو رینیو ہوں گے۔اقتصادی بحران سے گزر رہے جیٹ گروپ کے لئے فنڈ کا انتظام کرنے کے لئے گوئل دبئی اور لندن جانا چاہتے ہیں۔اضافی سالیسٹر جنرل منندر آچاریہ نے گوئل کی عرضی کی مخالفت کرتے ہوئے کہا کہ یہ 18 ہزار کروڑ روپے کی سنگین فراڈ کا معاملہ ہے۔ ایس ایف آئی او اس کی جانچ کر رہا ہے،نریش گوئل اور بیوی انیتا کو 25 مئی کو ممبئی ایئر پورٹ پر دبئی کی فلائٹ سے اتار لیا گیا تھا۔ جیٹ ایئر ویز کی مالی بے ضابطگیوں میں نریش گوئل کے مشتبہ کردار کو لے کر کئی ایجنسیاں تحقیقات کر رہی ہیں۔