بھٹکل تعلقہ انتظامیہ اور سابق ایم ایل اے کے تعاون سے کیا گیا مہاجر مزدوروں کی روانگی کا انتظام
بھٹکل 26/مئی (ایس او نیوز) اوڈیشہ اور جھار کھنڈ کے سیکڑوں مزدور جو ماہی گیری اور دیگر سرگرمیوں میں خدمات انجام دے رہے تھے اور لاک ڈاؤن کی وجہ سے پریشان تھے ان کو اپنے گھروں کے لئے روانہ کرنے کا انتظام بھٹکل تعلقہ انتظامیہ اور سابق ایم ایل اے منکال وئیدیا کی جانب سے کیا گیا۔
مہاجر مزدوروں کو ان کے گھر جانے کا انتظام کرنے کے لئے سرکاری احکام کے مطابق اس سے پہلے بھی تعلقہ انتظامیہ نے سیکڑوں مزدوروں کو ہبلی ریلوے اسٹیشن تک پہنچانے کا انتظام کیاتھا۔اب 25تاریخ کو پھر ایک بار تعلقہ انتظامیہ کی جانب سے کے ایس آر ٹی سی بسوں کے ذریعے 118مزدوروں کو منگلورو ریلوے اسٹیشن کے لئے روانہ کیا گیا، جہاں سے وہ لوگ ٹرین کے ذریعے جھارکھنڈ کے لئے سفر کریں گے۔
ان مزدروں کو روانگی سے قبل بھٹکل پرانے بس اسٹانڈ کے قریب جمع کرکے تھرمل اسکریننگ کی گئی اور اس کے بعد بسوں میں سوار کیا گیا۔ اس موقع پر بھٹکل تحصیلدارایس روی چندرا اور نوڈل آفیسر شمس الدین، لیبر ڈپارٹمنٹ کی آفیسر ریکھا نائک، محکمہ ماہی گیری کے آفیسرچیتن اور ٹاؤن پولیس سب انسپکٹر بھرت وغیر ہ موجود تھے۔
اسی طرح ماہی گیر کشتیوں میں خدمات انجام دینے والے اوڈیشہ کے باشندوں کو ان کے اپنے گاؤں روانہ کرنے کے لئے سابق ایم ایل اے منکال وئیدیا نے نجی بسوں کاانتظام کیا۔دور دراز علاقے سے آنے والے یہ مزدور بھٹکل تعلقہ کے تینگن گنڈی، الوے کوڈی جیسے بندروں پر ماہی گیری کررہے تھے مگر لاک ڈاؤن کے بعد کام نہ ہونے اور کھانے پینے کے علاوہ رہنے کا انتظام نہ ہونے سے پریشان تھے۔ ان کے لئے عبوری طور پر ایک شیڈ میں رہنے کا انتظام کیا گیا تھا۔ جب ان کی حالت زار سابق ایم ایل اے منکال وئیدیا کے علم میں لائی گئی تو انہوں نے دو نجی بسوں کو انتظام کیااور ان تمام71مزدورو ں کو ان بسوں کے ذریعے ان کے گاؤں کی طرف روانہ کردیا گیا۔روانگی سے قبل تمام مزدوروں کی تھرمل اسکریننگ کی گئی۔اس موقع پر ماہی گیر بندر کے سپرنٹنڈنٹ روی جالی اور جالی پٹن پنچایت کے سابق صدر عبدالرحیم وغیر ہ موجود تھے۔