بھٹکل 9/فروری (ایس او نیوز) بھٹکل پٹن پنچایت جالی میں ٹیکس اور دوسرے امور سے متعلقہ چالان اور رقم کی ادائیگی کے لئے سہولت کے طورپر کسی قومیائے گئے بینک کا کاؤنٹر کھولنے کا مطالبہ پٹن پنچایت کے اراکین نے کیا ہے اور اس ضمن میں چیف آفیسر کی معرفت سے ڈپٹی کمشنر کو میمورنڈم پیش کیا گیا ہے۔
پنچایت اراکین کے میمورنڈم میں کہا گیا ہے کہ جالی بھٹکل شہر سے کافی دوری پر واقع ہے اور اس علاقے میں کسی بھی بینک کی شاخ موجود نہیں ہے۔ اس وجہ سے پٹن پنچایت سے متعلقہ امور کی رقم اداکرنے کے لئے عوام کو تقریباً پانچ کلو میٹر کالمبا فاصلہ طے کرکے بھٹکل شہر میں آنا پڑتا ہے۔ مشکل یہ ہے کہ سو روپے کا چالان بھرنا ہوتو ڈیڑھ سوروپے رکشا کے لئے خرچ کرنا پڑتا ہے۔ اس کے علاوہ کام کاج اور مزدوری وغیرہ میں حرج بھی ہوتا ہے۔
بتایا گیا ہے کہ سنڈیکیٹ یا یونین بینک جیسے نیشنلائزڈ بینک والے اپنا ایکسٹنشن کاؤنٹر جالی پنچایت دفتر کے احاطے میں کھولنے پر راضی ہوگئے ہیں۔ اس لئے عوام کی سہولت کو مدنظر رکھتے ہوئے اس پر جلد فیصلہ کیا جائے۔
جالی پنچایت کے چیف آفیسر وینوگوپال شاستری نے میمورنڈم قبول کیااور اسے ڈی سی کو روانہ کرنے کا یقین دلایا۔ اس موقع پرپنچایت اراکین عبدالرحیم، آدم، فاطمہ، ممتاز، شہناز، پوریندرا، عمران لنکا وغیرہ موجود تھے