بیلگام میں سیلاب سے متاثرہ کسانوں کا وزیراعلیٰ یڈی یورپا کی کار کی آگے لیٹ کر احتجاج؛ معاوضہ کا مطالبہ
بیلگام 4/اکتوبر (ایس او نیوز) حال ہی میں آئے سیلاب سے بیلگام میں جو تباہی مچی تھی اور کھیت سمیت باغات سیلاب میں بہہ کر تباہ ہوگئے تھے، اُس تعلق سے ابھی تک سرکار کی طرف سے کوئی امداد نہ ملنے پر ناراض کسانوں نے آج جمعہ کو بیلگاوی سرکیوٹ ہاوس کے باہر وزیراعلیٰ یڈی یورپا کی کار کے آگے ہی لیٹ کر احتجاج کرنے لگے۔
ذرائع سے ملی اطلاع کے مطابق وزیراعلیٰ یڈی یورپا سرکیوٹ ہاوس کے باہر عوام کی شکایات سماعت کررہے تھے، جیسے ہی وہ اُدھر سے جانے کے لئے نکلے، احتجاجی کسانوں نے ریاستی اور مرکزی حکومت کے خلاف نعرے بازی شروع کردی اور سیلاب سے ہوئے نقصانات کا معاوضہ دینے کا مطالبہ کرنے لگے، جب وزیراعلیٰ کی کار آگے بڑھنے لگی تو اچانک کسانوں نے کار کے آگے پہنچ کر سڑک پر ہی لیٹ گئے اور کار کو آگے جانے سے روک دیا۔
احتجاجی کسانوں کا کہنا تھا کہ اپنے آپ کو کسانوں کا بیٹا قرار دینے والے وزیراعلیٰ ہماری اپیل کو ہی قبول کرنے تیار نہیں ہیں۔ انہوں نے کہا کہ اگر سرکار کے پاس ہمیں معاوضہ دینے کے لئے فنڈ نہیں ہے تو پھر سیلاب سے متاثرہ لوگوں سے احوال دریافت کرنے کا ناٹک کیوں کرتے ہیں ؟
بعد میں پولس نے مداخلت کرتے ہوئے کسانوں کو وہاں سے ہٹادیا اور وزیراعلیٰ کی کار کو آگے بڑھنے کے لئے راستہ دیا۔
