کاروار: میمو ٹرین کو ہارواڑ، چتراپور اور مرجان میں اسٹاپ دینے کا مطالبہ کرتے ہوئے ہارواڑ میں کیا گیا ریل روکو احتجاج
انکولہ، 17 ؍ جنوری (ایس او نیوز) ریلوے سروس سے متعلق مختلف مطالبات کے ساتھ سابق ایم ایل اے ستیش سائل اور جنا شکتی کی قیادت میں تعلقہ کے ہارواڑ میں ریل روکو احتجاج کیا گیا ۔
اس احتجاجی مظاہرے میں پدم شری یافتہ سُکری گوڈا اور تلسی گوڈا سمیت 50 سے زائد افراد نے حصہ لیا ، جس میں مظاہرین نے منگلورو سے مڑگاوں جانے والی میمور ٹرین کو ایکسپریس ٹرین کا درجہ دینے کی خصوصی طور پر مخالفت کی اور بطور احتجاج ریلوے پٹری پر لیٹ کر پاسنجر ٹرین کو روکا۔
مظاہرین کی طرف سے ریلوے ژونل منیجر بی بی نکّم کو دئے گئے میمورنڈم میں کہا گیا ہے کہ میمو ٹرین کو ایکسپریس ٹرین میں بدلنے کی وجہ سے بھٹکل کے چتراپور، کمٹہ کے مرجان اور انکولہ کے ہارواڑ میں اس ٹرین کا اسٹاپ بند کیا گیا ہے ۔ اس سے متعلقہ مقامات کے عوام کو اپنے کام سے دوسری جگہ کا سفر کرنے دشواری پیش آ رہی ہے ۔ اس لئے پہلے ہی کی طرح میمو ٹرین کو پاسنجر ٹرین کی شکل میں جاری رکھنا چاہیے۔
میمورنڈم وصول کرنے کے بعد ریلوے افسر نے مظاہرین کو یقین دلایا کہ دس کے اندر ان کے مطالبات پر غور کیا جائے گا ۔ اس احتجاج کے پس منظر میں احتیاطی طور پر ریلوے اسٹیشن کے اطراف سخت پولیس بندوبست کیا گیا تھا۔