بھٹکل نیشنل ہائی وے پر واقع بستی کائیکنی کراس پر انڈر پاس تعمیر کرنے کا مطالبہ۔مقامی لوگوں نےکیا احتجاجی مظاہرہ
بھٹکل،12؍جنوری (ایس او نیوز) بھٹکل تعلقہ کے بستی کائیکنی میں جہاں نیشنل ہائی وے فورلین توسیع کا کام چل رہا ہے وہاں پر عوامی تحفظ کے پیش نظر مقامی افراد نے انڈر پاس کی سہولت فراہم کرنے کا مطالبہ کرتے ہوئے احتجاجی مظاہرہ کیا ۔
تعلقہ پنچایت صدر ایشور نائک کی قیادت میں متعلقہ مقام پر جمع ہونے والے مظاہرین نے نیشنل ہائی وے اتھاریٹی آف انڈیا کے افسران کے خلاف نعرے بازی کی اور اپنے غصے کا اظہار کیا۔مظاہرین کا کہنا تھا کہ کوپّا ، کائیکنی ، کوپدامکّی جیسے بہت سے دیہاتوں میں بسنے اور جانے آنے والوں لوگ اس کراس کا استعمال کرتے ہیں۔ نیشنل ہائی وے سے لگی ہوئی کھیتیاں بھی موجود ہیں جہاں پر کاشتکار فصلیں بونے او ر کاٹنے کی سرگرمیاں انجام دیتے ہیں۔روزانہ بڑی تعداد میں مویشی چرنے کے لئے اس سڑک کو پار کرتے ہیں۔ ہائی وے کے کراس پر ہی اسکول اور دواخانے وغیرہ رہنے کی وجہ سے فطری طور پر عوام کی آمد و رفت اس جگہ مسلسل ہوتی رہتی ہے۔گاؤں کے لوگوں اور گرام پنچایت کی طرف سے ہائی وے افسران کے پاس انڈر پاس تعمیر کرنے کا مطالبہ کرنے کے باوجود اس پر دھیان نہیں دیا جارہا ہے۔اور توسیعی کام آگے اسی طرح آگے بڑھایاجارہا ہے جس کا مطلب حادثات کو دعوت دینے کے برابر ہے۔مظاہرین نے مطالبہ کیا کہ توسیعی کام فوراً بند کیا جائے اور انڈر پاس کی تعمیر کرتے ہوئے کام کو آگے بڑھایا جائے۔
مرڈیشور ریوینیو انسپکٹر شرینواس اورسی پی آئی دیواکرنے موقع پر پہنچ کر مظاہرین سے ان کی باتیں سنیں۔ اسسٹنٹ کمشنر نے ہائی وے افسران کے ساتھ بات چیت کرتے ہوئے مسئلہ حل کرنے کا تیقن دیا۔ اس موقع پر ضلع پنچایت رکن سندھو بھاسکر نائک، تعلقہ پنچایت رکن وشنو دیواڈیگا،وسنت نائک، چندرکانت نائک، راجو نائک، دیپک نائک ، وینکٹیش دیواڈیگا ، وینو ڈیوال وغیرہ موجود تھے۔