دہلی اسکولوں کی طرف سے دسویں اور بارہویں جماعت کے لیے اسکول کھولنے کے فیصلے کا خیرمقدم
نئی دہلی،15/جنوری (آئی این ایس انڈیا) قومی دارالحکومت میں اسکول کے پرنسپلز نے دسویں اور بارہویں جماعت کے طلبا کے لئے اسکول دوبارہ کھولنے کے حکومتی فیصلے کا خیرمقدم کرتے ہوئے کہا ہے کہ اس سے طلبا کو بورڈ کے امتحانات کی تیاری کے لئے کافی وقت اور ایک اچھا ماحول ملے گا۔
ماڈرن پبلک اسکول، شالیمار باغ کی پرنسپل الکا کپور نے کہاکہ طلبا کو اسکول بلانے کے فیصلے سے انہیں آنے والے بورڈ امتحانات کی تیاری میں مدد ملے گی۔اس کے علاوہ اسکول انتظامیہ اس طرح کے بہت سے اقدامات کرے گی کہ طلباء کو انفیکشن سے محفوظ رکھا جائے۔ طلباء کے آمدورفت کا سب سے محفوظ راستہ یہی ہوگا کہ وہ نجی گاڑیوں میں طلبا کو ان کے والدین اور سرپرستوں اسکول تک پہنچائیں۔
انہوں نے کہا کہ ایک وقت میں کلاس روم میں صرف چند طلباء موجود ہوں گے، تاکہ ٹیچروں کو طلبہ کے مابین مناسب جسمانی فاصلہ برقرار رکھنے اور انفیکشن کے پھیلاؤ کو روکنے میں مدد مل سکے۔ دہلی حکومت نے بورڈ امتحان کے پیش نظر 18 جنوری سے دسویں اور بارہویں جماعت کے اسکولوں کو دوبارہ کھولنے کی اجازت دے دی ہے۔ تاہم حکومت نے واضح کیا ہے کہ جسمانی حاضری لازمی نہیں ہے اور طلباء والدین کی رضامندی سے ہی اسکول جائیں گے۔ بہرحال کورونا وائرس کے پھیلاؤ کو روکنے کے لئے گذشتہ سال بند ہونے کے 10 ماہ بعد اسکول قومی دارالحکومت میں دوبارہ کھلنے جا رہے ہیں، جس کے لئے ڈائریکٹوریٹ آف ایجوکیشن نے ہدایت جاری کی ہے کہ پیر سے اسکولوں میں کلاسز شروع ہونے پر کوویڈ 19 کے روک تھام کے لئے تمام ہدایات پر عمل کیا جائے۔
روہینی کے ایم آر جی اسکول کی پرنسپل پرینکا برارہ کے مطابق حکومت نے والدین کے لئے اپنے بچوں کو اسکول بھیجنے کا متبادل انتظام کیا ہے۔ تاہم اس کا مشورہ یہ ہے کہ طلبا بورڈ امتحانات کی بہتر تیاری کے لئے اسکول آئیں۔ انہوں نے کہاکہ اسکولوں کو دوبارہ کھولنے کا فیصلہ صحیح وقت پر لیا گیا ہے، جب ہندوستان میں ویکسین دینے کی مہم شروع ہو رہی ہے۔