دہلی تشدد معاملے میں پہلا فیصلہ، فسادات اور لوٹ مار کرنے کے ملزم کو عدالت نے کیا بری
نئی دہلی،20/جولائی (ایس او نیوز/ آئی این ایس انڈیا) دہلی کی کڑکڑڈوما عدالت نے آج دہلی فسادات کے پہلے معاملے میں اپنا فیصلہ سناتے ہوئے فسادات اور لوٹ مار کے ملزم سریش عرف بھٹورا کو بری کردیا ہے۔
ایڈیشنل سیشن جج امیتابھ راوت نے کہا کہ ملزم کی شناخت قائم نہیں ہوسکتی ہے۔ گواہوں کے بیانات متضاد ہیں اس لئے ملزم سریش کو تمام الزامات سے بری کردیا گیا۔
واضح رہے کہ سریش پر ہجوم کا حصہ بننے، لوٹ مار کرنے، فسادات کو بھڑکانے کا الزام لگایا گیا تھا۔ اسے آئی پی سی کی دفعات 143، 147، 427، 454 اور 395 (ڈکیتی) کے تحت ملزم بنایا گیا تھا۔ سریش نامی شخص پر 25 فروری 2020 کو بابت پور علاقے میں آصف نامی شخص کی دکان میں گھس کر لوٹ مار کا الزام تھا۔
یاد رہے کہ فروری 2020 میں سٹی زن شپ ایکٹ کے حامیوں اور اس کی مخالفت کرنے والوں کے درمیان تشدد کے واقعات پیش آئے تھے جس میں 53 لوگ ہلاک اور 700 سے زائدزخمی ہوئے تھے۔