پارلیمانی انتخابات کے اخراجات۔ اترکنڑا میں شکست کھانے والے اسنوٹیکرجیت درج کرنے والے اننت کمار ہیگڈے سے د و قدم آگے
کاروار 29/جون (ایس او نیوز) حالیہ لوک سبھا انتخابات میں مقابلہ آرائی کرنے والے تمام امیدواروں کے لئے اپنے انتخابی اخرجات کی تفصیل الیکشن کمیشن کو پیش کرنے کی آخری تاریخ 22 جون تھی۔ اطلاع کے مطابق اترکنڑا ضلع سے مقابلے پر اترنے اور شکست سے دوچار ہونے والے کانگریس اور جنتادل ایس کے مشترکہ امیدوار آنند اسنوٹیکر نے جیت درج کرنے والے امیدوار بی جے پی کے اننت کمار ہیگڈے سے زیاد ہ رقم خرچ کی ہے۔
بتایا گیا ہے کہ آنند اسنوٹیکر نے 65,07,568روپے خرچ دکھایا ہے تو اننت کمار ہیگڈے نے اپنے خرچ کی تفصیل میں جملہ رقم 52,76,073 روپے بتائی ہے۔اسنوٹیکر نے جو خرچ دکھایا ہے وہ الیکشن کمیشن کی طرف سے مقررہ حد سے تقریباً پانچ لاکھ روپے کم ہے۔آنند نے حساب کی تفصیل میں بتایا ہے کہ انہیں یہ رقم مختلف افراد سے عطیہ کی شکل میں ملی ہے اور پارٹی کی طرف سے کوئی فنڈ موصول نہیں ہوا ہے۔جبکہ اننت کمار ہیگڈے نے اپنے حسابات کی تفصیل میں پارٹی کی جانب سے 40لاکھ روپے ملنے کی بات کہی ہے۔
اس الیکشن میں سب سے کم رقم خرچ کرنے والے امیدوار وں میں کمٹہ کے ناگراج شیٹھ کا نام شامل ہے جنہوں نے اپنا جملہ خرچ 37191 روپے دکھایا ہے۔ بھارت بھومی پارٹی کے امیدوار منجوناتھ سداشیو نے ابھی تک اپنے اخراجات کی تفصیل الیکشن کمیشن کے پاس جمع نہیں کروائی ہے۔انہوں نے اس کی وجہ یہ بتائی ہے کہ وہ ایک غریب آدمی ہیں ا س لئے ان کے اخراجات کا کوئی حساب رکھ نہیں پائے۔