بھٹکل:27؍ اکتوبر(ایس اؤ نیوز)18اکتوبر کو بھٹکل میونسپالٹی کے دکانوں کی نیلامی میں شریک ہوئے بھٹکل اسسٹنٹ کمشنر، تحصیلدار اور چیف آفیسر کے خلاف بغیر کسی وجہ کے ، غیرقانونی طورپر ہتک ذات کا معاملہ درج کئےجانے پر کرناٹکا ملازمین سنگھا بھٹکل شاخ نے مذمت کی ہے۔

اس سلسلےمیں سنگھا کی طرف سے بھٹکل اسسٹنٹ کمشنر کے توسط سے ریاستی گورنر کو میمورنڈم پیش کرتے ہوئے سنگھا کے صدر موہن نائک نے کہاکہ پروٹوکول کے مطابق  نیلامی کی کارروائی میں شریک کسی افسر نے بھی کسی کی ہتک نہیں کی ہے، سبھی کو دستوری سطح پر یکساں تصور کرتےہوئے نیلامی کی کارروائی کی گئی ہے۔ نیلامی میں شریک دنیش پاؤسکر نامی شخص نے  پسماندہ ذات کے فرد کو ملنے والی  دکان کو جعلی ذات کی سرٹیفکٹ والے فرد کو نیلامی میں دکان حاصل کرنےکا موقع دئیے جانے پر سوال اٹھایا تھا ، جس کا میونسپالٹی چیف آفیسر نےجواب بھی دیا تھا۔

بھٹکل اسسٹنٹ کمشنر اور تحصیلدار نے وضاحت کی تھی کہ حقیقی اور جعلی سرٹیفکٹ کے متعلق سکشم کمیشن کے افسران کے ذریعے جانچ کرائی جائے گی۔ اس کے باوجود افسران کے خلاف ہتک ذات کا مقدمہ درج کیاگیا ہے۔ حالیہ دنوں میں ایس سی /ایس ٹی قانون کا بہت غلط استعمال کیاجارہاہے۔ آگے اس طرح کے کسی مقدمے کو درج کرلینے سے پہلے پولس افسران کو چاہئے کہ وہ قانونی سطح  پر پوچھ تاچھ کرے۔

اسسٹنٹ کمشنر اور تحصیلدار کے خلاف ہی جھوٹے مقدمات درج کرتےرہیں گے تو اس سے انتظامیہ متاثرہوگی اور عوامی اعتماد میں کمی ہوگی اور عوام خوف کے ماحول میں زندگی گزارنے پر مجبور ہونگے۔ اس لئے سرکاری ملازمین کو شفاف اور انصاف والی خدمات انجام دینے کےلئے بہتر ماحول فراہم کیا جائے۔ بھٹکل اسسٹنٹ کمشنر ممتادیوی، تحصیلدار ایس روی چندر نے میمورنڈم کو وصول کیا۔ بھٹکل چیف آفیسر رادھیکا، وینوگوپال شاستری ، ملازمین سنگھا کے ریاستی ممبر پرکاش شرالی ،نائب صدر شمس الدین ، سکریٹری گنیش ہیگڈے ، ممبران سنیل نائک، رجنی دیواڑیگا وغیرہ موجود تھے۔