بنگلورومیں شب10تا صبح5بجے سخت نائٹ کرفیو دوبارہ نافذ
بنگلورو،4؍اگست(ایس او نیوز) ریاست بالخصوص ریاست کی راجدھانی بنگلورو میں ان دنوں کورونا کے معاملات میں اضافہ ہورہا ہے -اس وجہ سے بنگلورو میں رات 10بجے سے صبح 5بجے تک نائٹ کرفیو دوبارہ سختی کے ساتھ آج 3 اگست کی شب سے نافذ کردیا گیا ہے -شب 10 بجے کے بعد بغیر کسی ضروری سبب کے سڑکوں پر نکلنے والوں بالخصوص موٹرگاڑیوں میں باہر نکلنے والوں کے خلاف نہ صرف سخت کارروائی کی جائے گی بلکہ گاڑیاں ضبط کرکے بھاری جرمانہ بھی عائد کیا جائے گا-
بی بی ایم پی کے چیف کمشنر گوروگپتا نے آج یہاں میڈیا سے خطاب کرتے ہوئے کہاکہ حالانکہ ریاست کرناٹک سے زیادہ پڑوسی ریاستوں مہاراشٹرا اورکیرلا میں کورونا کے تازہ معاملات میں دن بدن اضافہ ہورہا ہے جس کی وجہ سے بنگلورو میں سخت نائٹ کرفیو نافذ کرنا لازمی ہوگیا ہے - انہوں نے بتایا کہ بیرونی ریاستوں سے کووڈ ٹسٹ کے بغیر بنگلور میں داخلہ کی اجازت نہیں ہوگی- اگر کوئی مسافر آ بھی گیا تو ایرپورٹ،ریلوے اسٹیشن پر ہی اس کا کووڈ ٹسٹ کیا جائے گا- نگیٹیو رپورٹ آنے پر ہی اس کو بنگلور داخل ہونے دیا جائے گا ورنہ وہیں سے واپس اس کی ریاست بھیج دیا جائے گا - دعویٰ کیا جارہا ہے اسی لئے احتیاطی اقدامات پرزوردیا جارہا ہے -