منگلورو میں قائم ہو سکتا ہے این آئی اے کا دفتر ۔ وزیر اعلیٰ بومئی نے دیا اشارہ
منگلورو،13/ اگست (ایس او نیوز) وزیر اعلیٰ کرناٹکا بسوا راج بومئی نے اشارہ دیا ہے کہ منگلورو میں این آئی اے کا دفتر قائم کرنے کے سلسلے میں جلد فیصلہ لیا جا سکتا ہے ۔
خیال رہے کہ پچھلے کچھ عرصہ سے ساحلی علاقہ میں مبینہ طور پر دہشت گردی کی بڑھتی سرگرمیوں کے پیش نظر منگلورو اور بھٹکل کو نشانہ بنا کر سنگھ پریوار کی طرف سے بار بار مطالبہ کیا جارہا تھا کہ یہاں این آئی اے کا دفتر قائم کیا جائے ۔ ابھی چند دن پہلے سابق ایم ایل اے عیدن ابا کے بیٹے کے گھر پر این آئی اے کی چھاپہ ماری اور عیدن ابا کے پوتے کی گرفتاری کے بعد یہ مطالبہ زور پکڑ رہا ہے ۔
ساحلی علاقہ کے دو روزہ دورہ پر آئے ہوئے وزیر اعلیٰ نے اخباری نمائندوں سے بات چیت کے دوران اسی تناظر میں اشارہ دیتے ہوئے کہا کہ مستقبل قریب میں منگلورو شہر میں این آئی اے کا دفتر قائم کیے جانے کے امکانات کا جائزہ لینے کے لئے میٹنگس کا سلسلہ شروع ہوگیا ہے ۔
وزیر اعلیٰ نے کہا :" پہلے ہی ہم نے ایک قابل شخصیت کو کرناٹکا کا وزیر داخلہ بنایا ہے ۔ وہ اب تک دو میٹنگس منعقد کرچکے ہیں ۔ آئندہ بھی وہ کچھ میٹنگس منعقد کریں گے ۔ ہوم منسٹر ساحلی اضلاع کا دورہ کریں گے اور اس معاملہ کی تحقیقات کریں گے ۔ اس کے بعد اس ضمن میں قطعی فیصلہ کیا جائے گا ۔ بہت ساری چیزوں کے بارے میں ہم کھلے عام کچھ کہہ نہیں سکتے ۔ لیکن اس تعلق سے جلد ہی ہم مناسب فیصلہ کریں گے ۔ "