پازیٹیو کی شرح 5فیصد ہونے پر لاک ڈاؤن ہٹانے ماہرین کی سفارش

بنگلورو،2؍ جون (ایس او نیوز) ریاستی وزیر برائے صحت و خاندانی بہبود ڈاکٹر کے سدھاکر نے کہا کہ ریاست میں کورونا متاثرین کی تعداد 5فیصد پر آنے کے بعد لاک ڈاؤن ختم کرنے کی ماہرین نے رائے دی ہے۔ اس وقت ریاست کے مختلف اضلاع میں کورونا پازیٹیو معاملات 5فیصد سے زیادہ ہیں۔اس لئے لاک ڈاؤن میں توسیع کرنے کا فیصلہ وزیراعلیٰ بی ایس ایڈی یورپا اپنے کابینہ ساتھیوں سے تبادلہ خیال کرنے کے بعد کریں گے۔

سدھاکر نے یہاں نامہ نگاروں کو بتایا کہ کورونا پازیٹیو معاملات کی شرح5فیصد ہونے تک لاک ڈاؤن مرحلوں میں ہٹایا جائے گا۔ اس سلسلہ میں وزیراعلیٰ ماہرین سے مشورہ کرنے کے بعد فیصلہ کریں گے کہ لاک ڈاؤن ہٹایا جانا چاہئے یا نہیں۔انہوں نے بتایا کہ ریاست میں لاک ڈاؤن7جون تک جاری ہے۔

اس سے قبل وزیراعلیٰ ماہرین کی رائے لیں گے۔انہوں نے بتایا کہ کورونا ٹسٹنگ، کورونا اموات کی تعداد کسی بھی صورت میں چھپانا ممکن نہیں۔روزانہ کورونا معاملات آئی سی ایم آر پورٹل پر اپ لوڈ کئے جارہے ہیں۔ریاست بھر میں کورونا متاثرین کی اطلاع حاصل کرکے پورٹل پر اپ لوڈ کی جاتی ہے۔دیگر ریاستوں میں کیا کیا جارہا ہے، انہیں اس کا علم نہیں۔اس کے باوجود اپوزیشن لیڈر کورونا تفصیلات چھپانے کا الزام لگا کر وہ اپنا فرض ادا کررہے ہیں لیکن صحیح اطلاع عوام تک پہنچانا ہماری ذمہ داری ہے۔

انہوں نے بتایا کہ بشمول سابق وزیرآر وی دیش پانڈے نے ہمارے سے کورونا سے متعلق مکمل اطلاع ہم سے طلب کی تھی، ہم نے فراہم کی ہے۔اطلاعات چھپانے کی خبریں بے بنیاد ہیں۔ بلیک فنگس مریضوں کے لئے 1300 ویلس انجکشن حاصل ہوئے ہیں، یہ ناکافی ہیں۔ اس ماہ جون 4یا 5سے قبل اس مرض کے لئے جتنے انجکشن درکار ہیں، کئے جائیں گے۔ مرکزی وزیر سدانندا گوڈا نے یہ تیقن دیا ہے۔

انہوں نے بتایا کہ ریاست کو کل 3لاکھ ڈوزس کوویکسین موصول ہوئے ہیں۔اس سے 45 برس سے زیادہ عمر والوں کو دوسرا ڈوز دیا جائے گا۔ جون کے پہلے ہفتے میں کوویکسین کا دوسرا ڈوز دینے کا سلسلہ شروع کیا جائے گا۔