لاہور 8 جون (ایس او نیوز/ایجنسی)  پاکستان کے صوبہ سندھ کے ضلع گھوٹکی میں ڈہرکی کے قریب دو مسافر ٹرینوں کے  درمیان ہوئے تصادم  میں منگل تک ملنے والی  اطلاع کے مطابق 62  افراد جاں بحق ہوگئے جبکہ  سو سے زائد مسافر زخمی ہوئے ہیں ۔

ہولناک حادثہ پیر کو اس وقت پیش آیا  جب  لاہور کی طرف جانے والی ملت ایکسپریس کراچی جانے والی سر سید ایکسپریس سے ٹکراگئی۔ بتایا گیا ہے کہ ٹکر سے پہلے  ملت ایکسپریس کی 10 سے زائد بوگیاں پٹری  سے اتر گئیں تھی، جس کے بعد مخالف سمت سے آنے والی سرسید ایکسپریس ان بوگیوں سے ٹکرا گئی۔ حادثے میں مجموعی طور پر ٹرینوں کی 13 سے زائد بوگیوں کو نقصان پہنچا ہے، جن میں ملت ایکسپریس کی 9 اور سرسید ایکسپریس کی 4 بوگیاں شامل ہیں۔

پاکستانی میڈیا کے مطابق  جائے حادثہ پرریسکیو آپریشن جاری ہے اس دوران بوگیوں کو کاٹ کر اس میں سے مزید4 لاشیں نکالے جانے کی اطلاع ملنے کے بعد  مرنے والوں کی تعداد بڑھ کر   62 کو پہنچ گئی ہے۔

ڈی سی گھوٹکی کے مطابق بیشتر زخمی مسافر رحیم یارخان کے اسپتال میں زیرعلاج ہیں، جن میں سے10زخمیوں کی حالت تشویشناک بتائی جارہی ہے، ٹریک کی بحالی کا کام بھی جاری ہے جبکہ متاثرہ بوگیوں کو جائے وقوع سے ہٹادیا گیا ہے۔

میڈیا رپورٹس کے مطابق ملت ایکسپریس کی بوگی نمبر 10 کے مسافر نے میڈیا سے گفتگو کرتے ہوئے بتایا  کہ بوگی کا کلمپ ٹوٹا ہوا تھا ، ٹرین کے ڈرائیور نے عملے سے کہا  تھا  کہ اسے ٹھیک کیا جائے مگر عملے نے انکار کر دیا جس کے بعد ڈرائیور ٹرین کو ویسے ہی لے آیا۔

زخمی مسافر کے مطابق روہڑی کراس کرنے کے بعد ٹرین کو جھٹکا لگتا محسوس ہوا اور حادثے کے وقت بوگی نمبر 10 گھسیٹتے ہوئے دوسرے ٹریک پر آئی تو سامنے سے آنے والی ٹرین سے ٹکرا گئی۔

واضح رہے کہ ملت ایکسپریس اور سر سید احمد ایکسپریس کو حادثہ اتوار اور پیر کی درمیانی شب   3 بج کر 48 منٹ پر  پیش آیا تھا