بنٹوال:سوشیل میڈیا پرمودی اور شاہ کو قتل کرنے کی دھمکی دینے کا الزام۔ بیرونی ملک میں ملازم ایک شخص
بنٹوال7/جنوری (ایس او نیوز)سی اے اے اور این آر سی کے پس منظر میں سوشیل میڈیا پرموافقت اور مخالفت میں جو پیغام رسانی کی جارہی ہے اس نے اب پولیس کی طرف سے گرفتاریوں کاروپ دھار لیا ہے۔
پچھلے کئی دنوں سے سوشیل میڈیا پر منافرت اور اشتعال پھیلانے کے الزام میں منگلورو پولیس نے کئی افراد کے خلاف کارروائی کی ہے اور دو تین لوگوں کو گرفتار بھی کرلیا ہے۔ اب تازہ کارروائی بنٹوال پولیس سرکل انسپکٹر ٹی ڈی ناگ راج اور سب انسپکٹر ونود نے کی ہے۔اور بیرونی ملک میں ملازم پیرووائی کے رہنے والے انور نامی ایک شخص کو اس وقت گرفتار کرلیا ہے جبکہ وہ چھٹی پر گھر آیا ہوا تھا۔
انورپر الزام ہے کہ اس نے وہاٹس ایپ پر سی اے اے کے خلاف اشتعال انگیز پیغام پوسٹ کیا تھااور مسلمانوں کو نقصان پہنچنے کی صورت میں وزیر اعظم نریندرا مودی اور امت شاہ کو قتل کرنے کی دھمکی دی تھی۔ اس کا یہ پیغام سوشیل میڈیا پر وائرل ہوگیاتھا۔اور پولیس انور کو دھردبوچنے کا موقع تلا ش کررہی تھی۔ اس دوران ایک ہفتے پہلے جیسے ہی انور چھٹی پر اپنے گھر پہنچا تو یتیش نامی ایک شخص نے اس کے خلاف پولیس میں شکایت درج کروائی کہ انور کے علاوہ اسی گاؤں کے ایک اور شخص نیاز نے مذہبی نفرت پھیلانے والے پیغامات عام کیے تھے۔ اس کے علاوہ وامنجورمیں رہنے والے اور بیرونی ملک میں مقیم وامنجور کے آر ایس ایس کارکنان کو بھی وہاٹس ایپ پیغامات کے ذریعے سی اے اے کی مخالفت کرنے پر اکسایا تھا۔
یتیش نے الزام لگایا ہے کہ انور نے اپنے پیغامات میں مودی اور امت شاہ کو جان سے مارنے کی دھمکیاں بھی دی ہیں۔ یتش کی شکایت پر کارروائی کرتے ہوئے انور کو گرفتار کرلیا گیا ہے اور وٹل پولیس اسٹیشن میں نیاز کے خلاف بھی شکایت درج کرلی گئی ہے۔