بھٹکل 28 اکتوبر(ایس او نیوز)  بنگلور سے تعلق رکھنے والے ایک شخص کی نعش آج بدھ صبح بھٹکل وینکٹاپور ندی سے برآمد ہوئی ہے جس کے تعلق سے پتہ چلا ہے کہ وہ بنگلور اپنے گھر سے جمعرات  کو نکلا تھا، پھر واپس گھر نہیں پہنچا تھا۔

بدھ صبح ایس ڈی پی آئی کے کارکنوں کو جیسے ہی وینکٹاپور کے لوگوں نے ندی میں ایک نامعلوم شخص کی نعش تیرتے ہوئے پائی جانے کی اطلاع دی،  کارکن فوری جائے وقوع پر پہنچ گئے اور ندی سے نعش کو باہر نکالا۔ اطلاع ملتے ہی بھٹکل مضافاتی پولس تھانہ کے پی ایس آئی اومکارپّا   سمیت دیگر پولس کے اہلکار بھی جائے وقوع پر پہنچ گئے تھے۔

قریب  70 سالہ اس شخص کے تعلق سے  ندی کے اطراف رہنے والوں نے لاعلمی کا اظہار کیا تھا  کہ  یہ کون شخص ہے، اس کے کپڑے ندی کنارے ایک جگہ پر سلیقے سے رکھے ہوئے پائے گئے تھے اور شرٹ کے کالر پر بنگلور کے ایک ٹیلر کا نام درج تھا، پولس نے ٹیلر کا پتہ لگاتے ہوئے ٹیلر کی مدد سے اس شخص کے گھر تک رسائی حاصل کی۔

گھر والوں نے لاش کی شناخت کرتے ہوئے بتایا کہ  مہلوک  شری نواس  کے ایس آرٹی سی کا ریٹائرڈ ملازم تھا اور وہ بنگلور میں اپنے بیٹے  گوپال کے ساتھ رہتا تھا۔

وہ بھٹکل کیسے پہنچا اور وینکٹاپور ندی میں اس نے خودکشی کرتے ہوئے اپنی جان لی یا  کیسے اس کی موت واقع  ہوئی، اس تعلق سے پولس جانچ کررہی ہے۔