بھٹکل 11/ اکتوبر (ایس او نیوز)  تعلقہ کے مُٹھلی کے ایک نہر سے آج بدھ صبح ایک لاش برآمد ہوئی  جس کی شناخت منجوناتھ عرف توکارام (64) کی حیثیت سے کی گئی ہے۔ بتایا گیا ہے کہ ساگر کا رہنے والا منجوناتھ بھٹکل کے سرپن کٹہ میں ایک جھونپٹری میں رہتا تھا اور بھیک مانگ کر اپنی اور اپنی اہلیہ کے ساتھ  زندگی گذار رہا تھا۔

اس کی موت کیسے واقع ہوئی، کیا پیر پھسل کر وہ نہر میں گر گیا تھا یا  کسی نے اس کا قتل کیا ہے یا پھر کیا ہوا تھا، ان سب کے تعلق سے بھٹکل کی مضافاتی پولس چھان بین کررہی ہے۔

بتایا گیا ہے کہ نہر کا پانی نہایت صاف ہونے کی وجہ سے آج صبح اس کی لاش نہر کے اندر پانی میں ڈوبی ہوئی نظر آئی، اوندھی حالت میں ہونے کی وجہ سے  چہرہ معلوم نہیں پڑ رہا تھا،  مقامی لوگوں نے فوری طور پر پولس کو واقعے کی جانکاری دی، جس کے بعد لاش کو باہر نکالا گیا اور سرکاری اسپتال منتقل کیا گیا، کافی پوچھ تاچھ کے بعد بالاخر دوپہر کو لاش کی شناخت ہوئی۔