کمٹہ 22/جون (ایس او نیوز) ’میدینی‘ نامی دیہات کمٹہ سے 38کیلومیٹر کی دوری پر سداپور کی سرحدسے قریب واقع ہے اور وہاں تک پہنچنے کے لئے جنگلاتی علاقے سے کیچڑ بھری سڑک سے ہوکر8کیلو میٹر تک پیدل گزرناپڑتا ہے۔ جوکہ برساتی موسم میں دشوارترین مرحلہ بن جاتا ہے۔ 53مکانات اور400مکینوں والے اس دیہات کی بدحالی اور مشکلات کی تفصیل جب ایک اخبار میں چھپی تو وزیراعلیٰ کمارا سوامی نے اس پر توجہ دی اور ڈپٹی کمشنر کو ڈاکٹر ہریش کمار کو ہدایت دی کہ وہ اس دیہات تک پہنچ کر معائنہ کریں اور اس کی تفصیل رپورٹ بھیجیں۔

 وزیراعلیٰ کی ہدایت پر ڈی سی نے ضلع پنچایت سی ای او محمد روشن، ڈی سی ایف کے گنپتی اور ضلع پنچایت کے انجینئروں کے ساتھ اس مقام کا دورہ کیا۔ سڑک کے راستے دیہات سے قریب پہنچنے کے بعد ڈپٹی کمشنر اور ان کاقافلہ 2کیلومیٹر پیدل چلتا ہوا میدینی گاؤں پہنچا۔وہا ں پر بجلی فراہم کی گئی ہے اور ایک پرائمری اسکول بھی قائم کیاگیا ہے۔ لیکن سب سے اہم مسئلہ گاؤں تک پہنچانے والی کیچڑ بھری سڑک ہے جس پر برسات کے موسم پیدل چلنایا موٹر سائیکل وغیرہ چلانا ناممکن ہوجاتا ہے۔ ڈی سی ڈاکٹر ہریش کمار نے گاؤں والوں سے بات چیت کرنے کے بعد انہیں یقین دلایا کہ جلد ہی سڑک کامسئلہ حل کردیا جائے گا۔ اور بارش کے موسم میں بی پی ایل کارڈ والوں کوجو راشن ملتا ہے وہ ان کے گھروں تک پہنچانے کا انتظام کیا جائے گا۔ سڑک کی تعمیر کے لئے ریوینیو زمین نہ ہونے کی وجہ سے جنگلاتی زمین کا استعمال ناگزیر ہے اور اس کے لئے محکمہ جنگلات کی جانب سے اجازت ملنا ضروری ہے۔ڈی سی انجینئر سے اس سڑک کا منصوبہ اور تخمینہ تیار کرنے کی ہدایت دی اورمحکمہ جنگلات کے افسران سے سڑک کی تعمیر کے لئے جنگلاتی زمین استعمال کرنے کی اجازت دینے کو کہا۔