داونگیرے،29؍جولائی(ایس او نیوز) ریاست کرناٹک میں کانگریس اگر اقتدار پر آئی تو سدارامیا کو پھرایک بار وزیراعلیٰ بنانے کا بیان دینے کے بعد سابق وزیر ورکن اسمبلی حلقہ چامراج پیٹ بی زیڈ ضمیر احمد شہ سرخیوں میں چھائے ہوئے ہیں، حالانکہ اس طرح کے بیانات سے باز رہنے اورکانگریس کی طے لکشمن ریکھا پارنہ کرنے کانگریس ہائی کمان نے سخت تاکید کی ہے۔ اس کے باوجود آئے دن ضمیر احمد خان کچھ نہ کچھ بیان دے رہے ہیں۔

انہوں نے داونگیرے میں کہاکہ کانگریس کو اقتدار پر واپس لانے کے لئے105اسمبلی حلقوں میں مسلم ووٹرس کا اہم کردارہوگا۔ داونگیرے میں نامہ نگاروں سے بات کرتے ہوئے انہوں نے کہاکہ مسلمانوں کی اکثریت سدارامیا کے ساتھ ہے۔ انہیں اقتدار پر واپس لانے کو یقینی بنانے میں مسلمانوں کا اہم رول رہے گا۔

انہوں نے دعویٰ کیا کہ سدارامیا نے وزیراعلیٰ کی حیثیت سے طبقہ کی مشترکہ فلاح وبہبودی کو یقینی بنایا۔ انہوں نے کئی اسکیموں کو کامیابی سے نافذ کیا جن میں ٹیپوسلطان جینتی بھی شامل ہے۔ اگلے ماہ 3 اگست کو اپوزیشن کانگریس لیڈر سدارامیا کی 75ویں سالگرہ ”مہااتسوا“ داونگرے میں منائی جارہی ہے، اس سلسلہ میں لوگوں کو اکٹھاکرنے ضمیر احمد ریاست کا دورہ کررہے ہیں۔ سدارامیا کے لئے تائید حاصل کرنے ضمیر احمد خان اقلیتی لیڈروں سے ملاقاتیں کررہے ہیں۔