دلت برادری کے لوگوں سے ملاقات کو راہل گاندھی نے بتایا حوصلہ بخش
نئی دہلی،25؍ستمبر(ایس او نیوز؍ایجنسی) پنجاب سے تعلق رکھنے والے دلت برادری کے لوگوں نے جمعہ کو یہاں کانگریس کے سابق صدر راہل گاندھی سے ملاقات کی اور ان کے کمیونٹی لیڈر چرنجیت سنگھ چنّی کو پنجاب کا وزیر اعلیٰ بنانے پر ان کا شکریہ ادا کیا۔
کانگریس کے رہنما سے ملاقات کے لیے ان کی رہائش گاہ پر پہنچے دلت برادری کے تمام لوگ پنجاب کے مختلف علاقوں سے آئے تھے اور انہوں نے پنجاب کو پہلا دلت وزیر اعلیٰ دینے سے متعلق راہل گاندھی کے فیصلے کو تاریخی قرار دیا اور ان کا شکریہ ادا کیا۔ اس موقع پر انھوں نے کہا کہ پنجاب میں دلت برادری اس فیصلے کے لیے ان کے تئیں دل کی گہرائیوں سے شکریہ ادا کر رہی ہے۔
راہل گاندھی نے خود بھی اس ملاقات کو حوصلہ افزا اور دلچسپ قرار دیا۔ انھوں نے کہا کہ وہ دلت برادری کے لوگوں سے مل کر بہت خوش ہیں۔ اس کمیونٹی کے لوگوں سے مل کر ان کے چہرے پر انہوں جو خوشی دیکھی ہے وہ حوصلہ افزا تھی۔ اس تعلق سے کیے گئے ایک سوشل میڈیا پوسٹ میں راہل گاندھی نے لکھا کہ ’’آج صبح دلت برادری کے رہنماؤں کے ساتھ ایک دلچسپ بات چیت ہوئی۔ بارش ہو یا دھوپ، ہم معاشرے کے تمام طبقات کے لیے یکساں مواقع کے اپنے عزم پر قائم رہیں گے۔‘‘