وجئے پور،5؍نومبر (ایس او نیوز) سابق ریاستی وزیراعلیٰ و کانگریس رہنما سدارامیا کے خلاف ان دنوں یہاں بی جے پی کے دلت رہنماؤں کی جانب سے احتجاجی مظاہرہ کا سلسلہ زور پکڑنے لگا ہے۔بتایاجاتا ہے کہ سدارامیا کی جانب سے سندگی الیکشن کے دوران ایک انتخابی ریلی میں بی جے پی دلت رہنماؤں کے خلاف یہ ریمارکس پاس کرنے کا الزام ہے کہ ”دلت اور دلت رہنما بی جے پی میں اپنا پیٹ پالنے کے لئے شامل ہوئے ہیں“۔ الیکشن گزرنے کے فوراً بعد یہاں کے بی جے پی دلت رہنماؤں نے مذکورہ مدا اٹھا کر سدارامیا کی مخالفت میں کھڑے ہیں جنہوں نے یہاں ایک احتجاجی مظاہرہ کرتے ہوئے سدارامیا کے مذکورہ بیان کی سخت مذمت کی ہے اور دلتوں سے معافی مانگنے کامطالبہ کیا ہے۔ آج یہاں بی جے پی کے دلت رہنماؤں نے امبیڈکر چوک میں دھرنابھی دیا۔رمیش جگ جنگی جو وجئے پور کے رکن پارلیمان ہیں اور دلت ہیں، انہوں نے اخباری نمائندوں کے ساتھ گفتگو کرتے ہوئے سدارامیا کے مذکورہ بیان کی سخت الفاظ میں مذمت کی اور سدارامیا سے سوال کیا کہ آپ کیوں جنتا دل چھوڑ کر کانگریس میں شامل ہوئے اس کا جواب دینا ہوگا۔اسی طرح مذکورہ احتجاج ریاست کے مختلف مقامات میں زور پکڑتا معلوم ہورہا ہے جبکہ بنگلور میں بھی دلتوں اور چلوادی سماج والوں نے سدارامیا کے خلاف احتجاج شروع کیا ہے۔دریں اثناء یہاں وجئے پور ضلع کانگریس کمیٹی کے دفتر میں ضلع صدر و سابق ایم ایل اے راجو الگور نے واضح طور پر بتایا کہ سدارامیا گویا کروبا طبقہ سے تعلق رکھتے ہیں، وہ دلت رہنماؤں سے زیادہ دلتوں کے ہمدرد ہیں جس کا مظاہرہ انہوں نے جب وہ ریاست کے وزیراعلیٰ تھے6دلتوں کو اپنی کابینہ میں لیا تھا۔اسی طرح دلتوں کے لئے اس وقت ہزار کروڑ کا بجٹ مختص کیا۔ علاوہ ازیں دلت کنٹراکٹرس کو ہر کنٹراکٹ کے نام میں ریزرویشن دلایا تھا۔اسی طرح دلتوں کے بے شمار فلاحی کام سدارامیا کے دوران اقتدار میں انجام دئے گئے اور آج بھی وہ دلت دوست ہیں جن کا موازنہ ارس سے کیا جاتا ہے مگر یہاں کے بی جے پی دلتوں اور رہنماؤں نے سدارامیا پر بے بنیاد الزامات عائد کرکے انہیں بدنام کرنے کی کوشش کررہے ہیں۔ راجو الگور نے سندگی الیکشن مہم میں یہ ضرور کہا تھا کہ چند دلت رہنما اپنے ذاتی مفاد کے لئے بی جے پی میں شامل ہوئے ہیں۔راجو الگور نے سوال کیا کہ دلت کے اکثریتی رہنما کسی بھی دلت پر ظلم ہوتا ہے تو انصاف دلانے کیوں نہیں آتے۔انہوں نے کہا کہ پیر8نومبر کو یہاں کے دلت بی جے پی کے خلاف احتجاجی مظاہرہ کرنے جارہے ہیں۔