منگلورو،23؍مئی (ایس او نیوز) جنوبی کینرا ڈپٹی کمشنر سندھو بی روپیش کی طرف سے جاری کردہ حکم کے مطابق مینگلور سمیت ضلع دکشن کنڑا میں سنیچر کی شام 7بجے سے پیر کے دن صبح 7بجے تک مکمل لاک ڈاؤن لاگو رہے گا۔ خیال رہے کہ کل اتوار کو مینگلور سمیت پورے ساحلی علاقوں میں عید الفطر منائی جائے گی اور کورونا وباء کو دیکھتے ہوئے قاضی صاحبان نے پہلے ہی اعلان کیا ہے کہ عیدالفطر کی نماز لوگ گھروں میں ہی ادا کریں گے۔
لاک ڈاون کے تعلق سے ڈپٹی کمشنر سندھو بی روپیش نے ضلع میں کووِڈ کی روک تھام کے لئے اس کو ایک احتیاطی قدم قرار دیا۔اور کہا کہ اس عرصے میں اشیائے ضروریہ کی خرید و فروخت پر کوئی پابندی نہیں رہے گی۔البتہ بقیہ دکانیں اور ہوٹل وغیرہ پوری طرح بند رہیں گے۔اس کے علاوہ عوامی سواریوں کی آمد و رفت پر پوری طرح پابندی لاگو رہے گی۔ اگر پہلے ہی سے کسی کے یہاں شادی تقریب منعقد کرنا طے پایا ہے تو ایسے لوگوں کو خصوصی اجازت نامہ حاصل کرنا ہوگا۔اور سرکاری احکامات کی حد میں ہی ایسی تقاریب منعقد کی جاسکیں گی۔اگر شادی کے سلسلے میں ایک مقام سے دوسرے مقام کی طرف سفر کرنا ہوتو پھر مقامی سطح پر متعلقہ افسران سے اس کے لئے اجازت حاصل کرنا ضروری ہوگا۔