منگلوروکے اپن انگڈی میں غیر قانونی طور پر جانور رفت کرنے کے الزام میں ایک شخص گرفتار۔22جانور سمیت لاری ضبط
اپن انگڈی،21/اکتوبر (ایس او نیوز) ایک ٹرک میں 22جانور بھر کر غیر قانونی طور پر منگلورو کی سمت لے جانے کے دوران نیلماڈی پولیس آؤٹ پوسٹ کے عملے نے لاری روک کر ملزم ڈرائیور نواز(23سال) کو گرفتار کرلیا اور جانوروں کے ساتھ ٹرک بھی ضبط کرلیا ہے۔
بتایاجاتا ہے کہ نیلماڈی میں سنیچر کے دن کی گئی پولیس کی طرف سے جانوروں سے بھری لاری کا پیچھا کرتے ہوئے انجام دی گئی اس کارروائی میں جو جانور ضبط ہوئے ہیں ان میں 17گائیں، 3بچھڑے اور 2بھینسیں شامل تھیں۔جانوروں سے بھری یہ لاری ہاسن سے منگلورو کی طرف جارہی تھی۔ گنڈیا چیک پوسٹ پر اس لاری کو روکنے کا سگنل دیا گیامگر ڈرائیور نے اس پر دھیان دئے بغیر تیز رفتاری سے گاڑی آگے بڑھا دی۔ اس پر پولیس عملے کو شک ہوا اور اس نے نیلماڈی آآٹ پوسٹ کے اے ایس آئی سیتا رام گوڈا کو اس کی اطلاع کردی۔ اس پرکارروائی کرتے ہوئے اے ایس آئی سیتارام گوڈا اورکانسٹیبل پرتاپ نے نیلماڈی میں لاری روکنے کی کوشش کی۔یہاں بھی ڈرائیور نے پولیس کے اشارے کی پروا کیے بغیر گاڑی آگے بڑھا دی، تو پولیس ٹیم نے اس لاری کا پیچھا کرنا شروع کیا اور کونالو گاؤں کے قریب اسے روکنے میں کامیابی ملی۔ اس موقع پر لاری پر سوار بقیہ چار افراد فرار ہونے میں کامیاب ہوگئے اورپولیس صرف ڈرائیور کو گرفتارکرنے میں کامیاب ہوئی۔