منگلورو،2؍جون (ایس او نیوز) مرکزی حکومت نے یکم جون سے 30؍جون تک لاک ڈاؤن 5ویں مرحلے کا اعلان کردیا ہے جس کے تحت مختلف مقامات پر وہاں کے حالات کے اعتبار سے پابندیاں لاگو رہیں گی۔

اس دوران جنوبی کینرا کی ڈپٹی کمشنر سندھو بی روپیش نے اعلان کیا ہے کہ ضلع میں اس پورے ایک مہینے کے دوران رات  9بجے سے صبح 5بجے تک سختی کے ساتھ مکمل کرفیو لاگو کیا جائے گا۔کرفیو کے وقت میں شہری اور مضافاتی علاقے میں یکساں طور پر موٹر گاڑیوں کی آمد ورفت اور عوامی چہل پہل پر مکمل پابندی رہے گی۔اور جو بھی اس قانون کی خلاف ورز ی کرے گا اس کے خلاف سخت کارروائی کی جائے گی۔اس کے علاوہ ڈی سی نے بتایا کہ دن کے وقت گھر سے باہر نکلنے والوں کے لئے چہرے پر ماسک لگانا لازمی ہوگا۔ بغیر ماسک کے باہر نکلنے والوں کو شہری علاقے میں 200روپے اور دیہی علاقوں میں 100روپے جرمانہ ادا کرنا ہوگا۔