مینگلور سمیت دکشن کنڑا میں موسلا دھار بارش کو لے کر 9/اگست تک ریڈ الرٹ: انتظامیہ کی طرف سے تعلیمی اداروں کو چھٹی اور افسران کو چوکس رہنے کی ہدایات
منگلورو:7؍اگست (ایس اؤ نیوز)دکشن کنڑا کے مختلف تعلقہ جات سمیت مختلف مقامات پرگزشتہ دو دنوں سے جاری موسلا دھار بارش کے نتیجےمیں سلیا، پتور کڈبا تعلقہ جات میں دیگر تعلقوں سے زیادہ بارش ریکارڈ کی گئی ہے۔ ضلع کی اکثر ندیوں میں طغیانی آئی ہےجبکہ کئی نشیبی علاقوں میں پانی جمع ہوجانے سے عوام پریشان ہیں۔ بارش سے مشکلات کے دوران افسران ،عوام اور سیاحوں کو سرکلر کے ذریعے ہدایات جاری کرتےہوئے ضلع دکشن کنڑا کے آفات سماوی نگراں کار بورڈ کے صدر اور دکشن کنڑا ضلع کے ڈپٹی کمشنر نے پیشگی اقدامات اور عملی ہدایات جاری کی ہیں۔
سرکلر میں کہاگیا ہے کہ محکمہ موسمیات کی طرف سے 9اگست 2019تک ریڈ الرٹ جاری کیا گیا ہے جس کو دیکھتے ہوئے ضلعی انتظامیہ نے پیشگی اقدامات کے طورپر دکشن کنڑا ضلع کے سبھی آنگن واڑی مراکز، سرکاری ، امدادی اور پرائیویٹ تعلیمی اداروں (ڈگری کالجوں تک ) میں کل 8اگست 2019کو بھی چھٹی کا اعلان کیا گیا ہے۔
سرکولر میں والدین سے کہا گیا ہے کہ وہ اپنے بچوں کو نشیبی علاقوں ، ندی اور سمندر کے کناروں پر مت بھیجیں، اگلے تین دنوں تک ماہی گیروں کو لازمی طورپر سمندر میں مچھلیوں کے شکار کے لئے نہ جانے کی بھی ہدایت دی گئی ہے۔ ضلعی اور تعلقہ سطح کے افسران کو تاکید کی گئی ہےکہ ان کا مرکزی مقام پر موجود رہنا لازمی ہے۔ اسی طرح ضلع انتظامیہ کی طرف سے نامزد کئے گئے نوڈل افسران کو کہا گیا ہے کہ وہ بیدار رہتے ہوئے عوامی شکایات اور مسائل پر فوری توجہ دیں اور ڈی سی دفتر کنڑول روم سے مسلسل رابطہ میں رہیں ۔ سیاحوں اور عوام کو اطلاع دی گئی ہے کہ وہ ندی ، نالے اور سمند ر کے ساحل پر نہ جائیں۔ آفات سماوی کو لےکر کسی بھی طرح کے کوئی مسائل ہوں تو ٹول فری نمبر 1077پر اطلاع دینے کہاگیا ہے۔