طوفان ”نیوار“کا اثر، تمل ناڈو میں موسلا دھار بارش، تملناڈوکے 13 اضلاع میں جمعرات کو عام تعطیل-چینئی سے 12 پروازیں منسوخ
چنئی،26؍نومبر (ایس او نیوز؍یو این آئی) گردابی طوفان ”نیوار“کے سبب تمل ناڈو کے چنئی میٹروپولیس اور نواحی علاقوں سمیت متعدد علاقوں میں گزشتہ شام سے موسلا دھار بارش ہورہی ہے -چنئی اور گردونواح میں موسلا دھار بارش کے نتیجے میں مختلف مقامات پر سڑکوں اور رہائشی علاقوں میں پانی بھر گیا ہے اور متعدد مقامات پر پانی گھروں میں داخل ہوگیا- سڑکیں پانی میں ڈوب جانے کی وجہ سے دو پہیہ گاڑی چلانے والوں کو کافی پریشانیوں کا سامنا کرنا پڑ رہا ہے -آفات کے انتظام کی تربیت یافتہ کمانڈو سمیت ہزاروں پولیس اہلکاروں کو ساحلی چنئی، کانشی پور، چینگلپیٹ، تریویلور اور کڈلور اضلاع میں تعینات کیا گیا ہے -ریاستی حکومت نے طوفان سے متاثرہ 7اضلاع میں چلنے والی بسوں کا آپریشن ردکردیا ہے - ریلوے نے مضافاتی ای ایم یو ٹرین کی خدمات کے ساتھ ہی متعدد ایکسپریس ٹرینوں کو منسوخ کردیا ہے -دریں اثناء ریاستی حکومت نے بدھ کے روز یہاں عام تعطیل کا اعلان کردیا ہے -سیلاب کی وارننگ جاری کرتے ہوئے انتظامیہ نے چمبیرمبکم آبی ذخائر کے گیٹ کھولنے اور ادیار ندی کے کنارے نشیبی علاقوں میں رہنے والے لوگوں کو وہاں سے منتقل کردیا گیا ہے -وہیں انتظامیہ نے چینئی آنے جانے والے 12 طیاروں کو منسوخ کردیا ہے -
