اگلے 24 گھنٹوں میں ساحلی کرناٹکا سے ٹکرا رہا ہے" کیار طوفان"؛ مینگلور سے لے کر کاروار تک بادلوں کی گرج کے ساتھ زبردست بارش کا امکان
مینگلور 24/اکتوبر (ایس او نیوز) ساحلی کرناٹکا یعنی مینگلور سے لے کر کاروار کے ساحل پر کیار نامی طوفان پوری شدت کے ساتھ ٹکرانے کا خدشہ ظاہر کیا گیا ہے جس کے نتیجے میں اگلے 48 گھنٹوں میں بادلوں کی گرج کے ساتھ زبردست بارش ہونے کا امکان ظاہر کیا گیا ہے۔
ذرائع سے ملی اطلاع کے مطابق ہوا کا دباو والا علاقہ جو اس وقت بحر عرب کے ایسٹ سینٹرل کے اوپر موجود ہے بہت جلد ڈپریشن میں تبدیل ہوجائے گا اور خدشہ ہے کہ نورتھ ویسٹ ڈائرکشن کی طرف آگے بڑھتے ہوئے کیار طوفان میں بدل جائے گا۔ بتایا گیا ہے کہ اگلے چوبیس گھنٹوں میں اس بات کا بہت زیادہ امکان ظاہر کیا گیا ہے کہ کافی تیز ہوائیں چلیں گی ، اب محکمہ موسمیات اس طوفان کی حرکت پر نظر رکھ رہا ہے اور امکان ظاہر کیا جارہا ہے کہ یہ طوفان ملک کے مغربی ساحل کی طرف بڑھے گا۔
سمجھا جارہا ہے کہ کیار طوفان سے دیگر علاقوں میں کوئی خاص اثر نہیں پڑے گا، البتہ اس کا اثر مغربی ساحل پر پڑسکتا ہے کیونکہ یہ طوفان ساحلی کرناٹکا ، مہاراشٹرا کے کونکن اور گوا سے شروع ہوگا اور 48 گھنٹوں بعد کمزور ہوتا ہوا عمان اور یمن کے ساحل کی طرف بڑھے گا۔
ضلع اُترکنڑا کے ڈپٹی کمشنر ڈاکٹر ہریش کمار نے اس موقع پر ضلع کے تمام ماہی گیروں کو متنبہ کیا ہے کہ وہ سمندر میں نہ اُتریں اور جو لوگ پہلے سے سمندر میں مچھلیوں کے شکار کے لئے نکل چکے ہیں وہ فوری قریبی بندرگاہ کی طرف لوٹ آئیں۔ انہوں نے بتایا کہ پیشگی اقدامات کے طور پر انڈین کوسٹ گارڈ کو ہرطرح کی مدد کے لئے تیار رکھا گیا ہے۔ اسی طرح مینگلور اور کاروار میں بالترتیب دو دو ساحلی کشتیوں اور ایک ایک تیز رفتار بوٹ کو بھی کسی بھی حالات سے نپٹنے کے لئے تیار رکھا گیا ہے ۔