نئی دہلی، 28/نومبر  (ایس او نیوز /ایجنسی) ہندوستانی محکمہ موسمیات (آئی ایم ڈی) کے مطابق، جنوبی-مغربی بنگال کی خلیج میں موجود گہرا دباؤ آئندہ 12 گھنٹوں میں طوفان 'فینگل' کی شکل اختیار کر سکتا ہے۔ یہ طوفان شمال-مغربی سمت میں بڑھتے ہوئے 30 نومبر کی صبح تمل ناڈو اور پڈوچیری کے ساحل سے ٹکرائے گا۔ ماہرین نے خبردار کیا ہے کہ کاریکل سے مہابلی پورم کے درمیان 50 سے 60 کلومیٹر فی گھنٹہ کی رفتار سے تیز ہوائیں چلیں گی اور شدید بارش متوقع ہے۔ محکمہ موسمیات کا کہنا ہے کہ بعض مقامات پر ہوا کی رفتار 70 کلومیٹر فی گھنٹہ تک پہنچ سکتی ہے۔

آئی ایم ڈی کی تازہ اطلاع کے مطابق 'ڈیپ ڈپریشن' گزشتہ 6 گھنٹوں میں مستحکم تھا اور یہ ترنکومالی سے تقریباً 100 کلومیٹر شمال-مشرق میں واقع تھا۔ اب یہ شمال مغرب سمت میں سری لنکا کے ساحل کے پاس بڑھتے ہوئے اگلے 12 گھنٹے میں طوفان میں تبدیل ہو جائے گا۔ امکان ہے کہ یہ طوفان 30 نومبر کی صبح تمل ناڈو-پڈوچیری ساحل پر پہنچے گا۔

مرکز کے ڈیوٹی آفیسر ایس کمار نے اے این آئی کو بتایا کہ ڈیپ ڈپریشن جنوب-مغرب بنگال کی خلیج میں کچھ گھنٹے پہلے شمال-مغرب سمت میں بڑھا ہے اور یہ اگلے دو دنوں میں سری لنکا کے ساحل کے پاس ہوتے ہوئے تمل ناڈو کے ساحل تک پہنچے گا۔

گہرے ڈپریشن کی وجہ سے پڈوچیری میں شدید بارش ہو رہی ہے۔ اس کی وجہ سے آج اسکول اور کالجوں کو بند رکھنے کا حکم دیا گیا ہے۔ پڈوچیری کے وزیر تعلیم اروموگم نم سیوائم نے یہ اطلاع دی ہے۔ پڈو چیری اور کاریکل میں 24 گھنٹے میں بالترتیب ساڑھے سات سینٹی میٹر اور ساڑھے نو سینٹی میٹر بارش ہوئی ہے۔ پڈوچیری کے وزیر اعلیٰ این رنگا سوامی نے افسروں کو نچلے علاقے کے لوگوں کو راحت کیمپوں میں لے جانے کی ہدایت دی ہے۔ 24/7 کنٹرول روم بھی بنایا گیا ہے تاکہ حالات پر نظر رکھی جا سکے۔

آئی ایم ڈی کے مطابق جمعرات کو تمل ناڈو، پڈوچیری اور کاریکل میں ہلکی سے تیز بارش، آندھی اور بجلی گرنے کا امکان ہے۔ کانچی پورم، چینگل پٹو، وِلوپورم اور کڈلور ضلعوں میں شدید بارش ہو سکتی ہے۔ ساتھ ہی چنئی، تروولور اور دیگر ضلعوں میں بھی الگ الگ علاقوں میں شدید بارش کا امکان ہے۔

خراب موسم کی وجہ سے انڈیگو ایئر لائنس نے بدھ کی رات پروازوں کے تاخیر کے سلسلے میں ایک ایڈوائزری جاری کی۔ کمپنی نے چنئی، توتی کورین، مدورئی، تروچراپلّی اور سلیم کے لیے پروازوں پر منفی موسم کی وجہ سے اثر پڑنے کی بات کہی ہے۔