کولکاتا،10؍نومبر (ایس او نیوز؍ یو این آئی)  مغربی بنگال کی وزیر اعلی ممتا بنرجی نے کہا کہ ’بلبل‘ طوفان کے پیش نظر ریاستی انتظامیہ کسی بھی طرح کی صورتحال سے نمٹنے کے لئے تمام طرح کی تیاریاں کر رہی ہے۔

ممتا بنرجی نے سنیچر کو ٹوئٹ کرکے کہا کہ بلبل بنگال سے ہوکر گزر نے والا ہے۔ انتظامیہ ریاست کی صورتحال پر 24 گھنٹے باریکی سے نظر رکھ رہی ہے۔ طوفان سے پیدا ہوئی صورتحال سے نپٹنے کے لئے تمام احتیاطی اقدامات کئے جارہے ہیں۔ اس کیلئے خصوصی کنٹرول روم قائم کیا گیا ہے اور نیشنل ڈیزاسٹر ریلیف فورس اور آفت منیجمنٹ فورس کی ٹیموں کو تعینات کیا گیا ہے۔

ریاستی حکومت نے طوفان کے پیش نظر احتیاطاََ تمام تعلیمی اداروں میں چھٹی کا اعلان کردیا ہے۔ شمالی اور جنوبی 24 پرگنہ اور مدناپور سمیت ریاست کے تمام ساحلی اضلاع میں پہلے ہی ہائی الرٹ اعلان کیا گیاہے اور دیگر اضلاع میں مقامی انتظامیہ نے ضروری اقدامات کئے ہیں۔

ماہری گیروں کو سمندر میں جانے سے منع کردیا گیا ہے اور پولیس ساحلی اضلاع میں لوگوں کو مسلسل الرٹ کررہی ہے۔ ادھر کولکتہ پورٹ ٹرسٹ کڈرپور میں ’ڈاک سسٹم‘ کے ساتھ ساتھ ہلدیا ’ڈاک سسٹم‘ کو اگلی ہدایت ملتوی کئے جانے کے بعد کم کرایہ پر فضائی سفر مہیا کرانے والی انڈیگو ایئرلائنس نے بلبل کی خطرناک شکل کے پیش نظر آج اپنی 23پروازیں منسوخ کردی ہیں۔