کانگریس میں اختلاف کے بڑھتے سر، سی ڈبلیو سی کی میٹنگ کوبتایادکھاوا، سینئر لیڈر نٹور سنگھ نے کہا ’’21 سالوں سے سونیا گاندھی ہیں پارٹی کی باس‘‘
نئی دہلی، 18 اکتوبر (آئی این ایس انڈیا)کانگریس ورکنگ کمیٹی کی میٹنگ کے ایک دن بعد پارٹی کے ایک سینئر لیڈر نے سونیا گاندھی کے بارے میں بڑا بیان دیا ہے۔ سابق وزیر خارجہ نٹور سنگھ نے سی ڈبلیو سی کے اجلاس کو رسمی قرار دیا۔ انہوں نے کہا کہ سونیا گاندھی گزشتہ 21 سالوں سے پارٹی کی سربراہ ہیں۔ انہوں نے کہا کہ 16 اکتوبر کو ہونے والے سی ڈبلیو سی کے اجلاس سے پہلے بیان بازی کرنے اور الزامات لگانے والے لیڈران اجلاس میں خاموش رہے، اس لیے اجلاس کا کوئی ٹھوس نتیجہ نہیں نکلا۔ انہوں نے کہا کہ پارٹی کی حالت کے مطابق ان دنوں پارٹی آنے والے اسمبلی انتخابات میں زیادہ کارکردگی نہیں دکھا رہی ہے۔نٹور سنگھ نے کہا کہ پارٹی کو مل کر کام کرنا چاہیے۔ اگر ایسا نہیں ہوا تو یہ پارٹی کے لیے اچھا نہیں ہوگا۔ ایسی صورت حال میں کانگریس سیاست میں بی جے پی سے بہت پیچھے رہ جائے گی۔ آنے والے دنوں میں پانچ ریاستوں میں ہونے والے اسمبلی انتخابات پر انہوں نے کہا کہ ویسے بھی مجھے نہیں لگتا کہ کانگریس پارٹی ایک سے زیادہ ریاستوں میں اپنی جیت درج کرائے گی کیونکہ اس کے پاس کوئی تنظیم نہیں ہے۔