حیدرآباد، 18/ستمبر(ایس او نیوز/ایجنسی) کانگریس ورکنگ کمیٹی کا حیدرآباد میں جاری دو روزہ اجلاس آج اختتام پذیر ہو گیا- اجلاس کے دوسرے دن سی ڈبلیو سی کی توسیعی میٹنگ کا انعقاد کیا گیا- میٹنگ کے اختتام کے بعد پارٹی نے ایک بیان جاری کرتے ہوئے کہا کہ توسیعی کانگریس ورکنگ کمیٹی کی یہ میٹنگ اس اعتماد کے ساتھ ختم ہوتی ہے کہ چھتیس گڑھ، مدھیہ پردیش، میزورم، راجستھان اور تلنگانہ کے عوام آئندہ اسمبلی انتخابات میں انڈین نیشنل کانگریس کو مینڈیٹ فراہم کریں گے-

اپریل-مئی 2024میں ہونے والے لوک سبھا انتخابات میں جیت کا عزم ظاہر کرتے ہوئے پارٹی نے کہا کہ ہم آنے والی لڑائی کے لیے پوری طرح تیار ہیں - ہم سمجھتے ہیں کہ ملک کے عوام تبدیلی چاہتے ہیں - ہم امن و امان، آزادی، سماجی اور معاشی انصاف، مساوات سے متعلق عوام کی توقعات پر پورا اتریں گے-

تلنگانہ کے حوالے سے جاری کردہ ایک اور بیان میں کانگریس نے کہا کہ تلنگانہ کی تشکیل کے9سال بعد سنہرے تلنگانہ کا وعدہ توڑا گیا، مرکزی اور حیدرآباد دونوں حکومتوں نے دھوکہ دیا- پارٹی نے کہا کہ ہم تلنگانہ کے عوام سے مخلصانہ اپیل کرتے ہیں کہ وہ آئندہ اسمبلی اور لوک سبھا انتخابات میں کانگریس کو ووٹ دیں - بنگارو تلنگانہ کے خواب کو دوبارہ زندہ کرنے اور وہ مستقبل فراہم کرنے کا وقت ہے جس کے تلنگانہ کے لوگ مستحق ہیں -

بی جے پی کی ناکامیوں کو عوام کے درمیان لایا جائے:کھرگے:کانگریس کے صدر ملیکارجن کھرگے نے حیدرآباد میں کانگریس ورکنگ کمیٹی (سی ڈبلیو سی) کے اجلاس کے دوسرے اور آخری دن اسمبلی اور لوک سبھا کے انتخابات کے لئے حکمت عملی کے سلسلہ میں اظہارخیال کیا- انہوں نے زور دیتے ہوئے کہا کہ ہندوستانی دستور اور جمہوریت کی بنیاد ڈالنے میں کانگریس کا تاریخی رول ہے - انہوں نے نشاندہی کی کہ اس کے تحفظ کی ذمہ داری کانگریس پر ہے - انہوں نے پارٹی لیڈروں سے خواہش کی کہ وہ بنیادی مسائل کو عوام کے درمیان لاتے ہوئے بی جے پی حکومت کی ناکامیوں اور عوام مخالف پالیسیوں کو اجاگر کرے - انہوں نے کہا کہ 2024میں گاندھی جی کے صدرکانگریس کے طور پر 100سال مکمل ہورہے ہیں - انہوں نے تجویز پیش کی کہ آنے والے انتخابات میں بی جے پی کو اقتدار سے ہٹانا گاندھی جی کو بھرپور خراج عقیدت ہوگا- انہوں نے مسلسل کوششوں اور رائے دہندوں کے ساتھ رابطہ کی ضرورت پر زور دیا، تاکہ غلط معلومات کا جواب دیا جاسکے اور ہندوستانی جمہوریت کا تحفظ کیا جاسکے - اس اجلاس میں کانگریس کی حکمرانی والی ریاستوں کے وزرائے اعلیٰ، کانگریس کی مختلف اکائیوں کے سربراہوں، سی ایل پی لیڈروں اور سی ڈبلیو سی کے ارکان نے شرکت کی، جس میں اہم امور اور پالیسیوں پر تبادلہ خیال و قراردادوں کے پس منظر میں انتخابی منصوبہ بندی پر توجہ مرکوز کی گئی- کھرگے نے نشاندہی کی کہ ہندوستان تبدیلی چاہتا ہے - انہوں نے کرناٹک اور ہماچل پردیش میں حالیہ انتخابی کامیابیوں کا ذکر کرتے ہوئے کہا کہ پارٹی کو بے تکان کام کرنے کی ضرورت ہے -