منگلورو ،3؍ اپریل (ایس او نیوز) منگلورو انٹرنیشنل ایئر پورٹ پر کسٹمز افسران نے جمعہ اور سنیچر کے دن تین مسافروں سے جملہ 1,18,71,430 روپے مالیت کا سونا ضبط کرلیا ہے جسے  اسمگل کرنے کی کوشش کی گئی تھی۔

کسٹمز کی طرف سے جاری تفصیل کے مطابق جمعہ کے افسران نے شارجہ اور دبئی سے لوٹنے والے عبدالسلام اور محمد اشرف نامی دو مسافروں کی تلاشی لی جن کا تعلق کاسرگوڈ سے ہے۔ عبدالسلام انڈیگو فلائٹ کے ذریعے منگلورو پہنچا تھا جبکہ اشرف دبئی سے ایئر انڈیا طیارے سے آیا تھا۔ ان دونوں نے ہی جینس شرٹس کے بٹنس اور شوز کے اندر خصوصی خانہ بناکر سونے کی چین چھپا رکھی تھی۔ ان کے پاس سے جملہ 576 گرام سونا ضبط کیا گیا جس کی مالیت 26,43,840 روپے ہے۔

سونا ضبط کرنے کا دوسرا بڑا معاملہ سنیچر کے دن پیش آیا۔ بتایا جاتا ہے کہ  دبئی سے ایئر انڈیا فلائٹ سے لوٹنے والے محمد آصف کی تلاشی سے پتہ چلا کہ اس نے پیسٹ کی شکل میں سونا اپنے اندرونی کپڑوں، جینس پینٹس اورگھٹنوں کے پیڈس میں بڑی مہارت کے ساتھ چھپا رکھا ہے۔ ضبط کیے گئے سونے کا وزن 1.993 کلو گرام ہے اور اس کی مالیت کا اندازہ 92,27,590 روپے لگایا گیا ہے۔ 

تینوں مسافروں کو گرفتار کرلیا گیا ہے اور مزید تحقیقات جاری ہے۔