میسور میں ویک ینڈ کرفیو کا اثر، تمام سڑکیں اور بس اسٹانڈ سنسان
میسورو،17؍جنوری (ایس او نیوز) ریاستی حکومت کی جانب سے جاری کردہ گائیڈ لائنس کے تحت بروز جمعہ رات 10بجے تا بروز پیرکی علی الصباح 5بجے ویک ینڈ کرفیو کے تحت میسورو میں دوسرے دن بھی پوری پابندی اور سختی کے ساتھ عمل کیا گیا اور لوگوں نے خود کی حفاطت کیلئے گھروں میں بند رہنے کو ترجیح دی جس کی وجہ سے میسور کی تمام سڑکیں، کے یس آر ٹی سی بس اسٹانڈ، میسورو کے مارکیٹ ویران نظر آرہے تھے۔ صرف چند افراد کاروں اور موٹر بائک میں ایک جگہ سے دوسری جگہ گھومتے نظر آئے۔ ضروری اشیاء کی دکانوں اور پراویژن اسٹورس کو کھلا رکھنے کی اجازت دی گئی تھی۔ اس کے باوجود تمام دکانیں ویران نظر آئیں اور خریداری کرنے والا کوئی نہیں تھا۔دکانوں کے مالک کافی بور نظر آرہے تھے۔ میسور کے دیوراجہ مارکیٹ، وانی ولاس مارکیٹ اور منڈی مارکیٹ کا بھی یہی حال رہا۔ دکانوں کے مالکوں نے زیادہ خریداری نہ ہونے کی وجہ سے دوپہر کے بعد اپنی دکانیں بند کردیں۔ گوشت، چکن اور مچھلی کیلئے بھی بہت کم خریدار نظر آئے۔