ریاست میں بھاری بارش سے 6.53لاکھ ایکڑ کی فصلیں تباہ ، ریاستی محکمہ زراعت اورمحصولات کا مشترکہ سروے
بنگلورو ،13؍ستمبر (ایس او نیوز) گزشتہ ایک ماہ سے ریاست بھر میں مسلسل جاری بارش کی وجہ سے زرعی زمینات جزیرہ بن گئے ہیں اور اب تک 6.53 لاکھ ایکڑ علاقہ کی فصل تباہ ہوئی ہے۔
محکمہ زراعت اورمحکمہ محصولات کی جانب سے کائے گئے مشترکہ سروے میں انکشاف کیاگیا ہے کہ 9ستمبر تک دھارواڑ میں 1.15لاکھ ایکڑ کلبرگی میں 1.11 لاکھ ایکڑ،گدگ ضلع میں 1.2 لاکھ ایکڑ، ہاویری میں 89,950، بیدر میں 52,497 ایکڑ اورچترادرگہ میں 50,136ایکڑ علاقوں کی فصلیں تباہ ہوئی ہیں۔
بتایا جاتا ہے کہ چکبالاپور،کولار، ٹمکور، بنگلور دیہی سمیت مختلف اضلاع میں بھی فصلوں کے نقصان کا سروے جاری ہے اور نقصان دہ ایکڑکا شمار 10لاکھ تک ہوسکتا ہے۔ رواں سال مانسون میں بہترین بارش کی وجہ سے تمام اضلاع میں بویائی کا کام کیاگیا اور76.53لاکھ ایکڑ زمین پر بویائی مکمل ہوئی اور بہترین فصل آئی تھی لیکن موجودہ بارش نے فصلوں کو تباہ کردیا۔
محکمہ زراعت کے ایک افسرنے بتایاکہ بارش سے مکئی جوار، مونگ دال، توردال، کپاس، چنا، راگی اوردھان کی فصلوں کو زیادہ نقصان پہنچا ہے جب کہ ترکاریاں زمین میں سڑ گل گئی ہیں۔ انہوں نے بتایاکہ سروے مکمل ہونے کے بعد ہی زرعی وباغبانی فصلوں کے نقصان کا صحیح اندازہ لگایا جاسکے گا۔
اس سلسلے میں ریاستی وزیر برائے زراعت بی سی پاٹل نے کہاکہ فصلوں کے نقصان کے تعلق سے محکمہ زراعت اور محصولات کی جانب سے مشترکہ سروے جاری ہے اور اب تک محکمہ محصولات کے پورٹیل میں 60فیصد نقصان دہ علاقہ کی تفصیل درج کی جاچکی ہے۔
گنا کاشتکار تنظیم کے ریاستی صدر کروبور شانت کمار نے بتایاکہ محکمہ زراعت اور محصولات کی جانب سے صرف چند علاقوں میں ہی سروے کیا جارہا ہے اور صرف5.80 لاکھ ایکڑ علاقہ متاثرہ ونے کا دعویٰ کیا جارہا ہے جب کہ تقریباً 10لاکھ ایکڑ کی فصلوں کو نقصان پہنچا ہے۔