پی ایف آئی پر جاری کریک ڈاؤن کو لے کر ایس آئی او نےکہا؛ یہ مخالف آوازوں پر قدغن لگانے اور آزادی کو کچلنے کی سازش ہے
نئی دہلی 22 ستمبر (ایس او نیوز) ملک کے مختلف حصوں میں ایک ساتھ پی ایف آئی دفاتر میں چھاپوں اور لیڈروں کی گرفتاریوں پر ردعمل ظاہر کرتے ہوئے اسٹوڈینٹس اسلامک آرگنائزیشن (ایس آئی او) نے اخباری بیان جاری کرتے ہوئے پی ایف آئی کے اراکین کے خلاف ملک گیر کریک ڈاؤن کو حکومت کی جانب سے مخالف رائے رکھنے والوں کے خلاف تفتیشی ایجنسیوں کے اختیارات کے غلط استعمال کی ایک اور جیتی جاگتی مثال قرار دیا ہے۔
پریس ریلیز میں ایس آئی او کے قومی صدر محمد سلمان احمد نے کہا کہ ہم نے بارہا دیکھا ہے کہ کس طرح حکومت نے عام لوگوں اور گروہوں، خاص کر اقلیتی اور پسماندہ طبقات سے تعلق رکھنے والے افراد کی آزادیوں کو کچلنے کے لیے یو اے پی اے جیسے سخت قوانین اور این آئی اے جیسی ایجنسیوں کو استعمال کیا ہے۔ ہمارا ماننا ہے کہ ان چھاپوں اور گرفتاریوں کا مقصد صرف اور صرف اختلاف رائے کو جرم بنا کر پیش کرنا ہے اور ان تمام لوگوں کو ڈرانا ہے جو حکومت سے سوال کرنے کی ہمت رکھتے ہیں۔ پریس ریلیز میں ایس آئی او نے تمام شہریوں سے اپیل کی ہے کہ وہ طاقت کے اس طرح بے دریغ استعمال کے خلاف آواز بلند کریں۔