بھٹکل 22/جون (ایس او نیوز) ریاستی حکومت نے کورونا متاثرین کی بڑھتی ہوئی تعداد کے پیش نظر اب منتخب نجی اسپتالوں کو کووِڈ 19 کا علاج کرنے کی اجازت دے دی ہے۔جس کا مطلب یہ ہے کہ سرکار ی طور پر مفت علاج کی جو سہولت تھی وہ اب دستیاب نہیں رہے گی بلکہ مریضوں کو اپنی جیب سے علاج کا خرچ برداشت کرنا ہوگا۔
سرکاری حکم نامے کے مطابق ضلع شمالی کینرا میں جن 14اسپتالوں کو کورونا کے علاج کی اجازت دی گئی ہے ان کے نام اس طرح ہیں:
بھٹکل: آر این ایس ہاسپٹل، مرڈیشور
ہوناور: شری دیوی نرسنگ ہوم، سینٹ اگنی شیئس ہاسپٹل،ڈاکٹر وی کے بی بلکور میموریل ہاسپٹل،
کمٹہ: کینرا ہیلتھ کیئر سینٹر کمٹہ، اچوت پنڈت ہاسپٹل، ڈاکٹر جانو میٹرنٹی اینڈ نرسنگ ہوم، رام لیلا ہاسپٹل، ہائی ٹیک لائف لائن،
سرسی: وشوا سیو ا سمیتی روٹری چیریٹیبل ہاسپٹل، ٹی ایس ایس ہاسپٹل،
کاروار: شیٹی آئی ہاسپٹل،
یلاپور: سائی نیترالیہ۔
بعض ذرائع سے معلوم ہوا ہے کہ نجی اسپتالوں میں 70فیصد مریضوں کے علاج کے خرچ کا% 30حصہ سرکار کی طرف سے ادا کیا جائے گا۔ اس کے علاوہ آیوشمان بھارت اور آروگیہ کرناٹکا ہیلتھ کارڈز کے تحت بھی ان مریضوں کا علاج کیا جا سکے گا۔
اس بات کا بھی پتہ چلا ہے کہ نجی اسپتالوں میں علاج کے لئے حکومت کی طرف سے نرخ بھی طے کیے گئے ہیں جس کے مطابق ایک مریض کے لئے یومیہ خرچ اس طرح ہوگا: جنرل وارڈ 5,200 روپے، آکسیجن کے ساتھ 7,500 روپے،آئسولیشن وارڈ 8,500روپے، گلے سے تھوک کانمونہ جانچ کرنے کے لئے 2,600 روپے،آئی سی یو وینٹی لیٹر کے ساتھ 12,000روپے۔
سرکاری طور پر طے کیا گیا ہے کہ منتخب شدہ کوئی بھی نجی اسپتال اب کورونا مریض کے علاج سے انکار نہیں کرسکے گا اور حکومت کی جانب سے طے شدہ چارجز سے زیادہ بل بنانے پر متعلقہ اسپتال کے خلاف قانونی کارروائی کی جائے گی۔ لیکن اس سلسلے میں سرکاری طور پر ابھی باضابطہ سرکیولر سامنے نہیں آیا ہے۔