اترکنڑا ضلع کو 15090ڈوز کووڈ ویکسن : 16جنوری سے ضلع کے 11مراکز پرشروعات
کاروار:14؍جنوری (ایس اؤ نیوز)بیلگام ڈویزن میں اترکنڑا ضلع سمیت 7اضلاع کو تقسیم کئے جانے و الے 1.47لاکھ ڈوز کووی شیلڈ انجکشن کو لےکر پونا سے نکلی سواری بیلگام کے ویکسن ڈپو کو بدھ کی صبح پہنچنے کی افسران نے جانکاری دی ہے۔
بیلگام ضلع کے ڈی سی ایم جی ہیرے مٹھ اور صحت عامہ کے افسران کی موجودگی میں محکمہ کی خاتون عملے نے سواری کا استقبال کیا اس کے بعد افسران کی موجودگی میں ویکسن کے 13باکس کو واک ان کولر میں بحفاظت رکھاگیا۔آئندہ اسی طرح مرحلہ وار ویکسن کی آمد و رفت جاری رہے گی۔فی الحال بیلگام ڈویزن کو پہنچی ویکسن میں سے اترکنڑا ضلع کو 15090، بیلگام کو 35960،وجئے پورا کو 18720، باگلکوٹ کو 16730، کوپل کو 11720، گدگ کو 10870، ہاویری کو 8280اور دھارواڑ کو 28380ڈوز تقسیم کئے جائیں گے۔ متعلقہ اضلاع کی سواریاں بیلگام پہنچ کر اپنے حصہ کی ویکسن لائیں گے۔
16جنوری سے شروعات:ویکسن لگانے کا کام 16جنوری سے باقاعدہ آغاز ہوگا۔ویکسن پہلے مرحلے میں کورونا وارئیرس کو لگایاجائے گا۔ اسی دن ضلع کے 11مراکز میں صبح 30-11ویکسن لگائے جائیں گے۔ سب سے پہلے میونسپالٹی مزدوروں کو ویکسن لگانے کے بعد صحت عامہ کے کارکنان کو لگایاجائےگا۔ ایک مرکز میں یومیہ 100لوگوں کو ویکسن لگائے جائیں گے۔ جس کے لئے پہلے سے عملے کو تربیت دی گئی ہے۔اترکنڑا ضلع ڈی سی ڈاکٹرہریش کمار نے بتایا کہ اس سلسلےمیں بدھ کوصحت عامہ کے افسران کی میٹنگ کرتےہوئے کئی ایک ہدایات دی گئی ہیں۔