کورونا کی بڑھتی وجہ انتخابات، تہوار، ڈبل میوٹینٹ؛ ایمس کے ڈائریکٹر ڈاکٹر رندیپ گلیریا کا بیان
نئی دہلی، 18؍اپریل (ایس او نیوز؍ایجنسی)ملک میں کورونا کیسوں میں زبردست اضافہ دیکھنے میں آرہا ہے۔ وبا کی دوسری لہر اتنی خطرناک ہے کہ مریضوں کے خدمت گار، ڈاکٹر اور پیرامیڈیکل عملہ بھی انفیکشن کے شکار ہو ر ہے ہیں۔
ادھر دہلی میں واقع ایمس کے ڈائریکٹر ڈاکٹر رندیپ گلیریا نے کہا کہ کئی ساری وجوہات کے باعث کورونا کیس بڑھ رہے ہیں، لیکن اس کے دو اہم عوامل ہیں۔ گلیریا نے کہاکہ جب جنوری اور فروری میں ویکسی نیشن شروع ہوئی اور کیسوں میں کمی واقع ہوئی،تو لوگوں نے کووڈ پروٹوکول پر عمل کرنا چھوڑ دیا۔آج یہ ڈبل میوٹینٹ وائرس تیزی سے پھیل رہا ہے۔
انہوں نے کہا کہ ا س کے طبی نظام پر بھی واضح اثرات دیکھ رہے ہیں۔ ہمیں کیسوں کی بڑھتی ہوئی تعداد کے مد نظر اپنے اسپتال کے بیڈ اور دیگر وسائل میں اضافے کرنے ہوں گے۔ ہمیں کووڈ کیسوں کے گراف کو نیچے لانا ہے۔
انہوں نے کہا کہ یہ ایک ایسا وقت ہے جب ہمارے ملک میں کئی ساری مذہبی سرگرمیاں ہورہی ہیں، اور انتخابات بھی ہو رہے ہیں۔ ہمیں یہ سمجھنا چاہئے کہ زندگی اہم ہے۔ ہم ان مذہبی سرگرمیوں کو پابندی اور ضابطہ کے ساتھ کرسکتے ہیں، تاکہ مذہبی جذبات مجروح نہ ہوں اورکورونا ضابطہ پر بھی عمل کیا جاسکے۔دہلی میں ہمارے ہاں اس کے بڑھتے ہوئے کیس 6-7 ماہ قبل کی نسبت زیادہ ہیں۔