منگلورو : گلف جانے والے مسافروں کے لئے خوشخبری - سفر سے پہلے کووڈ پوزیٹیو ہونے پر مفت میں بدلی جا سکے گی سفر کی تاریخ
منگلورو 19/ جنوری (ایس او نیوز) خلیجی ممالک کے لئے اڑنیں بھرنے والی ایئر لائنس کمپنیوں نے ان مسافروں کے لئے راحت دینے کا اعلان کیا ہے جو ٹکٹ بک کرنے کے بعد سفر سے پہلے یا پھر عین سفر کے لئے ایئر پورٹ پہنچنے پر کووڈ پوزیٹیو نکلتے ہیں ۔ ایسے مسافروں کو اپنا ٹکٹ کینسل کرنے کے بجائے اسے اگلی تاریخ پر مفت میں ہی ری شیڈول کیا جا سکے گا ۔
کووڈ پروٹوکول کے مطابق سفر سے 48 گھنٹے قبل اور طیارے میں بورڈنگ سے 6 گھنٹے قبل کووڈ کے لئے آر ٹی پی سی آر ٹیسٹ کروانا اور ان کی رپورٹ نگیٹیو نکلنا لازمی ہے ۔ بالفرض رپورٹ پوزیٹیو نکلے تو مسافروں کو طیارے میں بورڈنگ کی اجازت نہیں ملتی جس کی وجہ سے مسافر اپنا سفراگلی تاریخ کے لئے طے کرنے یا پھر ٹکٹ کینسل کرنے پر مجبور ہوجاتے ہیں ۔ سفر کو اگلی تاریخ پر ملتوی کرنے پر ری شیڈولنگ چارجس 200 روپے سے 750 روپے تک لاگو ہوتے ہیں جبکہ ٹکٹ کینسل کرنے پر کم از کم 2500 روپے کا نقصان مسافروں کو برداشت کرنا پڑتا ہے ۔
کووڈ کی موجودہ صورتحال دیکھتے ہوئے ایئر انڈیا اور دیگر دو ایئر لائنس کمپنیوں نے کووڈ متاثرہ مسافروں کو اپنی سفر کی تاریخ بغیر کسی معاوضہ کے بدلنے کی سہولت دینے کا اعلان کیا ہے اور کہا ہے کہ پہلے سے بک کیے گئے زمرے میں ہی سفر ری شیڈول کرنے پر کوئی چارج نہیں لگے گا ۔ اگر مسافر اپنے سفر کی کلاس بدلتے ہیں تو پھر اس کلاس کے جو اضافی چارجس ہونگے وہ ادا کرنے ہونگے ۔ ٹکٹ کینسل کرنے کی صورت میں جو چارجس پہلے سے طے ہیں وہ لاگو ہونگے ۔
ایئر لائنس کی طرف سے یہ بھی واضح کیا گیا ہے کہ ملتوی کی گئی تاریخ پر اگر ٹکٹ کی قیمت زیادہ رہے گی تب بھی مسافر اپنے پرانی قیمت والے ٹکٹ پر ہی بغیر اضافی خرچ کے سفر کر سکیں گے ۔