اُڈپی 6/جون (ایس او نیوز) کرناٹک کے ساحلی ضلع اُڈپی میں ممبئی سے لوٹنے والوں میں  کورونا سے متاثرہ لوگوں کی تعداد میں بے تحا شہ اضافہ ہونے کا سلسلہ جاری ہے اور آج سنیچر کو پھر 121 کورونا پوزیٹو کی تصدیق ہوئی ہے جس کے ساتھ ہی یہاں کورونا سے متاثرہ لوگوں کی تعداد بڑھ کر 889 ہوگئی ہے۔ مگر ان سب کے بائوجود خوش آئند بات یہ ہے کہ اُڈپی میں اگر سو سے زائد لوگ اسپتال میں ایڈمٹ ہورہے ہیں تو وہیں سو کے قریب لوگ روزانہ اسپتال سے صحت یاب ہوکر ڈسچارج بھی ہورہے ہیں۔ آج بھی اُڈپی سے  103 لوگوں کو گھر روانہ کیا گیا ہے۔

آج جو 121 کورونا کے معاملات سامنے آئے ہیں اس میں 78 مرد اور 43 خواتین ہیں جس میں 16 بچے بھی شامل ہیں، یہ سبھی لوگ مہاراشٹرا سے لوٹ کر آئے تھے اور انہیں اُڈپی پہنچتے ہی کورنٹائن کیا گیا تھا۔ آج پوزیٹو آنے والوں میں 120 لوگ اُڈپی کے ہی رہنے والے ہیں لیکن ایک شخص پڑوسی ضلع دکشن کنڑا سے ہے ۔

اُڈپی ضلعی انتظامیہ کے مطابق  4,306 متاثرہ لوگوں نے اپنی 14دنوں کی کورنٹائن  مدت پوری کرلی ہے۔ حکام کے مطابق 132 لوگ ہوم کورنٹائن ہیں اور دیگر 80 لوگ سرکاری کورنٹائن میں ہیں۔ ان میں سے تین لوگ ہائی رسک مریض اور ایک کم رسک والا مریض ہے جنہیں اسپتال میں ڈاکٹروں کی نگرانی میں کورنٹائن کیا گیا ہے۔ 74 لوگوں کو ایسولیشن وارڈ میں رکھا گیا ہے جس میں آج کے 12 معاملات بھی شامل ہیں۔

ذرائع سے ملی اطلاع کے مطابق  اب تک  12,528 نمونے جانچ کے لئے روانہ کئے گئے تھے جس میں سے   11,218 نمونے نیگیٹو آچکے ہیں جس میں آج سنیچر کو موصول ہونے والے 226 نیگیٹو معاملات بھی شامل ہیں۔ 422 نمونوں کی رپورٹ اب آنی باقی ہے۔

اُڈپی میں جملہ 889 معاملات  کی تصدیق ہونے کے  بعد جملہ 233 لوگوں کو ڈسچارج بھی کیا گیا ہے، جس کے ساتھ ہی اُڈپی میں ایکٹو معاملات 654 رہ گئے ہیں، یاد رہے کہ اُڈپی میں کورونا سے   ایک کی موت کی بھی تصدیق  ہوچکی ہے۔