فروری میں کووِڈ کی تیسری لہر کم ہونے کے قوی امکانات: ڈاکٹر سدھاکر
بنگلورو، 27؍جنوری (ایس او نیوز) ریاستی وزیر برائے صحت وخاندانی بہبود ڈاکٹر کے سدھاکر نے بتایا کہ آئی سی ایم آر کے مطابق فروری کے دوسرے یا تیسرے ہفتہ میں کووِڈ کی تیسری لہر کم ہوگی۔
یہاں سدا شیونگر کے اپنے گھر کے قریب اخباری نمائندوں سے بات کرتے ہوئے ڈاکٹر سدھاکر نے اس خیال کا اظہار کیا اور کہا کہ احتیاط برتنے سے تیسری لہر پر قابو پایا جاسکتاہے۔ انہو ں نے کہا کہ ریاست بھر میں کووِڈ کے دونوں ویکسین کو عوام نے تقریباً صد فی صد لیا ہے جس کی وجہ سے قوت مدافعت میں اضافہ ہوا ہے۔
انہو ں نے بتایا کہ بنگلور کے سوا کے دیگر اضلاع میں کووِڈ پازیٹی ویٹی شرح گزشتہ ہفتہ 22فیصد تھی جو اس ہفتہ 32فیصد ہوئی ہے۔ انہوں نے بتایا کہ اسپتالوں میں کووِڈ مریضوں کے داخلہ کا تناسب کم ہے جس کے تحت سرکاری اسپتالوں میں 3,442اور نجی اسپتالوں میں 1,788سمیت کل 5,230 مریضوں کے داخلہ لیا ہے۔ انہو ں نے بتایا کہ 3.62لاکھ سرگرم کووِڈ معاملات میں سے 2فیصد سے بھی کم مریض اسپتالوں میں داخل ہوئے ہیں، اس طرح مرض کا اثر زیادہ نہیں ہے، اس لئے عوام احتیاط برتیں خوف کھانے کی ضرورت نہیں ہے۔
انہوں نے بتایا کہ محکمہ صحت کی جانب سے ویژن رپورٹ تیار کی جارہی ہے جس کے تحت اگلے 20 سالمیں کرناٹک کی طبی حالت کیسی ہو اور تین مرحلوں میں طبی نظام کو کس طرح مضبوط کیا جائے،اس کا خلاصہ کیا جائے گا۔ رپورٹ تیار کرنے والی کمیٹی میں 30سینئر ماہرین موجود ہیں۔ انہوں نے بتایا کہ گزشتہ ایک سال سے تقریباً 750ماہرین اس رپورٹ کوتیار کرنے میں مصروف ہیں اور 28جنوری کو بسواراج بومئی کے بطور وزیر اعلیٰ 6ماہ مکمل ہوں گے، اس دن بومئی رپورٹ کا اجرا کریں گے۔