کووڈ-19 ابھی ختم ہونے کی دہلیز پر بھی نہیں پہنچا: عالمی ادارہ صحت
اقوام متحدہ،یکمجولائی (ایس او نیوز؍ایجنسی) صحت کے عالمی ادارے (ڈبلیو ایچ او) کے سربراہ نے خبردار کیا ہے کہ تقریباً 6 ماہ گزر جانے کے بعد بھی کورونا وائرس کا وبائی مرض ابھی ختم ہونے کی دہلیز پر بھی نہیں پہنچا۔
سربراہ نے لوگوں کو زندہ بچانے کے لئے عالمی سطح پر نئے سرے سے کورونا مخالف عزم کا مطالبہ کیا کیونکہ دنیا بھر میں یہ کیسز ایک کروڑ لاکھ سے تجاوز کرچکے ہیں، جبکہ 500000 اموات ہچکی ہیں اور یہ وائرس پھیلتا ہی جا رہا ہے۔
انہوں نے صحافیوں سے کہا کہ سب چاہتے ہیں کہ یہ ختم ہوجائے اور ہم سب اپنی زندگیوں کے ساتھ رواں دواں ہوجائیں لیکن مشکل حقیقت یہ ہے کہ اس وبا نے ابھی تک ختم ہونے کی چوکھٹ پر قدم نہیں رکھا۔
انہوں نے کہا کہ اگر چہ بہت سے ممالک نے کچھ پیشرفت کی ہے، لیکن عالمی سطح پر یہ وبائی مرض تیزی سے بڑھ رہا ہے اور ہم سب کو ابھی ایک طویل سفر طے کرنا ہے۔
عالمی صحت تنظیم کے ڈائرکٹر جنرل ڈاکٹر تیدروس گوبریس نے کووِڈ19- پر باقاعدہ پریس سے بات چیت کے دوران پیر کو کہا کہ ڈبلیو ایچ او ہمیشہ سے کہتا رہا ہے کہ وائرس کے ذریعہ کی معلومات نہایت اہم ہیں۔ ہم وائرس سے اسی وقت بہتر طریقہ سے لڑ سکتے ہیں جب ہمیں اس کے بارے میں سب کچھ پتہ ہو، یہ بھی کہ یہ کیسے شروع ہوا، ہم اس کی تیاری کے لئے اگلے ہفتہ ایک ٹیم کو چین بھیج رہے ہیں۔
ہم امید کرتے ہیں کہ ہمیں یہ معلوم ہو سکے گا کہ اس وائرس کی شروعات کیسے ہوئی اور مستقبل کے لئے ہم کیسے تیاری کرسکتے ہیں۔ ایک سوال کے جواب میں انہوں نے کہا کہ وائرس کافی جارحانہ انداز میں پھیل رہا ہے۔ کسی ٹیکہ یا علاج کی دریافت ہونے تک انتظار کرنے کے بجائے ہم رابطہ کا پتہ لگا کر سماجی دوری وغیرہ جیسے اقدامات سے اس کے پھیلاؤ کو روک سکتے ہیں۔