مینگلور: دکشن کنڑا میں دراندازی روکنے 7 ؍ چیک پوسٹ قائم؛ ضلع میں داخل ہونے والے تمام افراد کی ہوگی جانچ
منگلورو، 5؍ مئی (ایس او نیوز ) دکشن کنڑا ضلع میں داخل ہونے والوں پر نظر رکھنے ضلعی انتظامیہ نے تلپاڈی، ہجماڈی ، گنڈیا، جلسور، چارمڑی ، ناروای اور کلوگنڈی میں 7 چیک پوسٹ قائم کیے ہیں۔ اس بات کی اطلاع دیتے ہوئے ڈپٹی کمشنر سند ھو بی روپیش نے بتایا کہ ضلع میں داخل ہونے والے تمام افراد کی جانچ کی جائے گی اور پڑوسی ضلع اور ریاست سے آنے والوں کو کورنٹائن میں رہنے کو کہا جائے گا۔انہوں نے کہا کہ چونکہ مینگلور میں 12 ؍ گھنٹوں تک نرمی کا اعلان کیا گیا ہے عوام کو گھروں سے نکلتے وقت انتہائی محتاط رہنا چاہیے ۔ سماجی فاصلہ کی برقراری کے علاوہ عوامی مقامات پر ماسک پہننا لازمی ہے۔
انہوں نے مزید کہا کہ ضلع میں کورونا وائرس کے 24 کیسس کے منجملہ صرف 4 مریضوں میں عارضہ تنفس کی علامات ہیں جبکہ مابقی غیر علامتی ہیں۔ 9 ایکٹیو کیسس میں ایک مریض کی حالت نازک ہے جبکہ دو مریضوں کو ڈسچارج کیے جانے کا امکان ہے۔
دریں اثناء اُڈپی ضلع میں معمولاتِ زندگی بحال ہورہی ہے جہاں معمول کی ٹریفک دیکھی گئی اور تمام سڑکوں کو ہر قسم کی گاڑیوں کی نقل و حرکت کے لیے کھول دیا گیا۔ ضلع میں الیکٹرانک سامان کی دکانات بشمول موبائیل فون شورومس صبح 7 بجے سے دوپہر 1 بجے تک کھلی رہیں گی۔ الیکٹرانک دکانات میں صرف 10 ملازمین کو کام کرنے کی اجازت ہوگی اور دکان میں بیک وقت صرف 10 گاہکوں کو ہی داخل ہونے کی اجازت رہے گی۔ ملبوسات کی دکانوں میں 25 ملازمین اور 25 گاہکوں کو اجازت رہے گی۔