بنگلور 30/اپریل (ایس او نیوز/پی وی) کرناٹک میں کوویڈ۔19 کے معاملات میں تشویشناک حد تک اضافہ ہورہا ہے اور بدھ شام پانچ بجے سے جمعرات شام پانچ بجے تک یعنی 24 گھنٹوں میں کرناٹکا میں کورونا کے 30 نئے معاملات سامنے آئے ہیں جس کے ساتھ ہی کرناٹک میں کورونا مریضوں کی تعداد بڑھ کر 565 ہوگئی ہے۔

اطلاع کے مطابق  اب تک کرناٹک میں کورونا سے 21 لوگوں کی موت ہوچکی ہے، 229 لوگ صحت یاب ہوکر اسپتال سے ڈسچارج ہوچکے ہیں جبکہ 314 کورونا پوزیٹو مریض مختلف اسپتالوں میں زیر علاج ہیں۔ بتایا گیا ہے اس میں 9 لوگوں کو آئی سی یو میں رکھا گیا ہے۔

آج جمعرات کو جو 30 تازہ معاملے سامنے آئے ہیں اُس میں صرف ایک بیلگام ضلع سے ہی 14معاملات ہیں جبکہ  بنگلور شہر سے نو، بیجاپور سے دو، ، دکشن کنڑا، ٹمکور، کلبرگی اور داونگیرہ سے ایک ایک  شخص میں کورونا پوزیٹو کے اثرات پائے گئے ہیں ۔

آج کے نو معاملات کےساتھ بنگلور میں کورونا سے متاثرہ لوگوں کی تعداد بڑھ کر 141 تک  پہنچ گئی ہے، دوسرے نمبر پر میسور ہے جہاں 88 اور بیلگام میں 67 کورونا پوزیٹو مریض پائے گئے ہیں۔

ذرائع سے ملی اطلاع کے مطابق کوویڈ سے صحت یاب ہوکر آج جمعرات کو میسور میں سات لوگ صحت یاب ہوچکے ہیں اور اُنہیں اسپتال سے چھٹی دے دی گئی ہے۔یہ بھی بتایا گیا ہے کہ جمعرات کو میسور میں کورونا کا کوئی نیا کیس سامنے نہیں آیا۔