کرناٹک میں آج کورونا کے مزید 45 معاملے آئے سامنے؛ دبئی سے لوٹنے والے 20 لوگوں کی رپورٹ آئی پوزیٹو؛ ضلع جنوبی کینرا کے 16 اور اُُڈپی کے 5 لوگ پائے گئے کورونا سے متاثر
بنگلور15/مئی (ایس او نیوز) ملک بھر میں لاک ڈاون چل رہا ہے ، مگر نوول کورونا وائرس کے اثرات کم ہونے کے بجائے بڑھتے جارہے ہیں، آج جمعہ کو ریاست کرناٹک میں 45 نئے معاملات کے سامنے آنے کے ساتھ ہی کورونا مریضوں کی تعداد کا اکڑہ ایک ہزار کو بھی کراس کرگیا ہے۔ ہیلتھ بلٹین میں دی گئی اطلاع کے مطابق کل جمعرات شام پانچ بجے سے آج جمعہ صبح بارہ بجے تک جملہ 45 کورونا متاثرین پائے گئے ہیں جس کی بنا پر ریاست میں کورونا سے متاثرہ لوگوں کی تعداد بڑھ کر 1032 ہوگئی ہے۔
خیال رہے کہ 1032 کورونا کے معاملوں میں اب تک 35 لوگوں کی موت بھی ہوچکی ہے جبکہ 476 لوگ صحتیاب ہوکراسپتالوں سے ڈسچارج بھی ہوچکے ہیں۔ اس طرح مختلف اسپتالوں میں کورونا کے 520 ایکٹیو کیسس ہیں۔
آج کے نئے کیسس میں 16 کا تعلق ضلع جنوبی کینراسے ہے، 13 بنگلور سے اور پانچ اُڈپی سے ہے۔ ہاسن اور بیدر سے تین معاملات، چتردرگہ سے دو معاملات اور باگلکوٹ، شموگہ اور کولار سے ایک ایک معاملے سامنے آئے ہیں۔
ذرائع سے ملی اطلاع کے مطابق آج کے نئے کورونا معاملات میں 20 لوگ دبئی سے لوٹے ہوئے لوگ ہیں، ممبئی سے آئے ہوئے چار لوگ اور چینائی سے آئے ہوئے تین لوگ شامل ہیں۔ بتایا گیا ہے دیگر جن لوگوں کی رپورٹس کورونا پوزیٹو آئی ہے وہ کنٹینمنٹ زون کے رابطے والے ہیں۔