بھٹکل 19/مئی (ایس او نیوز) ملک بھر میں کورونا لاک ڈاون میں چھوٹ ملتے ہی مختلف ریاستوں میں پھنسے ہوئے لوگ اپنے اپنے گاوں جانے کے لئے نکل پڑے ہیں، جس کے چلتے ہی کرناٹک میں آج منگل کو صبح بارہ بجے تک ملنے والی اطلاع میں 127 کیسس پوزیٹو ملنے کی خبر دی گئی ہے۔ کرناٹک میں کل پیر کو جب 99 پوزیٹو معاملات سامنے آئے تھے تو سمجھا جارہا تھا کہ  یہ سب سے بڑی تعداد ہے، لیکن آج منگل کو  کورونا معاملوں کی تعداد نے حکام کو جھنجھوڑ کر رکھ دیا ہے۔ 

پیر شام پانچ بجے سے منگل صبح بارہ بجے تک جو ریاستی ہیلتھ بلٹین جاری کی گئی ہے، اس کے مطابق 127 نئے معاملات سامنے آئے ہیں جس میں سب سے زیادہ کیسس منڈیا سے ہیں جہاں  62  لوگوں کی رپورٹ کورونا پوزیٹو آئی ہے، حیرت کی بات یہ ہے کہ سبھی 62 لوگ مہاراشٹرا سے منڈیا پہنچے تھے۔

ریاست میں دوسرے  نمبر پر داونگیرے ہے جہاں 19 کورونا پوزیٹو معاملات سامنے آئے ہیں، شموگہ میں 12، کلبرگی میں 11، بنگلور (اربن) میں 6،  اُترکنڑا  اور اُڈپی میں چار چار، ہاسن میں3،  چکمنگلور میں 2 اور گدگ، یادگیری، چتردرگہ، بیجاپور میں ایک ایک معاملات ہیں۔

آج ریاست کے مختلف اضلاع کی کورونا پوزیٹو کی جو رپورٹ سامنے آئی ہے اس میں 90 لوگوں کی سفری ہسٹری مہاراشٹرا سے ہے جبکہ کیرالہ اور گجرات سے تین تین اور آندھرا پردیش اور تمل ناڈو سے ایک ایک  لوگ آئے ہیں۔