کرناٹک میں سنڈے لاک ڈاؤن کا آغاز ، بنگلورو میں رات 8 بجے سے پیر کی صبج 5 بجے تک لاک ڈاؤن نافذ

Source: S.O. News Service | Published on 5th July 2020, 2:14 PM | ریاستی خبریں |

بنگلورو،5؍جولائی(ایس او نیوز) کرناٹک میں ان دنوں کورونا کی وبا تیزی سے پھیل رہی ہے ۔ ریاست کا دارالحکومت بنگلورو اب کورونا کا بھی کیپٹل بنتا جارہا ہے۔ ان حالات کو دیکھتے ہوئے ریاستی حکومت نے ہفتہ واری لاک ڈاؤن نافذ کرنے کا سلسلہ شروع کیا ہے ۔ یعنی ریاست بھر میں اس ماہ کے ہر اتوار کو لاک ڈاؤن رہے گا ۔ بنگلورو میں اس ہفتہ واری لاک ڈاؤن کا آغاز آج بروز سنیچر کی رات 8 بجے سے شروع ہوا ہے ، جو پیر کی صبح 5 بجے تک جاری رہے گا ۔

33 گھنٹوں پر مشتمل اس کرفیو میں صرف ضروری خدمات اور کاروبار بحال رہیں گے ۔ اسپتال ، میڈیکل اسٹور ، دودھ ،  سبزی ، راشن ، گوشت کی دکانیں کھلی رہیں گی ۔ ہوٹل ، ریسٹورنٹ ، شراب کی دکانیں ، بیوٹی پارلر، حجام کی دکانیں ، کپڑے ، جوتے ، چپل ، سونا ، چاندی ، ہارڈویئر ، الیکٹرانکس اشیا اور اس طرح کی تمام دکانیں بند رہیں گی ۔ پارک ، کھیل کود کے میدان سب بند رہیں گے ۔ اس لاک ڈاؤن کے دوران سٹی بس سروس ، آٹو ، ٹیکسی سروس بھی بند رہے گی ۔ بنگلورو میں میٹرو ٹرین کی سروس گزشتہ تین ماہ سے بند ہے ۔ریاست میں 8 جون سے عبادت گاہوں کو عوام کیلئے کھول دیا گیا ہے ۔ لیکن 33 گھنٹہ پر مشتمل ہفتہ واری لاک ڈاؤن کے دوران تمام عبادت گاہیں بھی بند رہیں گی ۔

بنگلورو سٹی جامع مسجد کے خطیب و امام مولانا مقصود عمران رشادی نے کہا کہ مسجدوں میں صرف مسجد کا عملہ ہی نماز ادا کرے گا ۔ لوگ اپنے اپنے گھروں میں رہ کر جماعت کے ساتھ فرض نمازیں ادا کرلیں ۔ لاک ڈاؤن کے اوقات کے بعد مسجدوں کا رخ کریں ۔ بنگلورو پولیس نے سختی کے ساتھ ہفتہ واری لاک ڈاؤن نافذ کرنے کا فیصلہ کیا ہے ۔ رات 8 بجے سے ہی شہر کے تمام فلائی اوور اور اہم سڑکوں کو بیریکیڈ ڈال کر بند کردیا گیا ۔ غیر ضروری طور پر موٹر سائیکل اور کاروں میں گھومنے والوں پر جرمانہ عائد کرنے کا فیصلہ کیا گیا ہے ۔ بنگلورو کے پولیس کمشنر بھاسکر راو نے ٹویٹ کے ذریعہ لوگوں کو گھروں میں ہی رہ کر اتوار منانے کی اپیل کی ہے ۔ بھاسکر راو نے کہا کہ لوگ کسی بھی طرح کی رعایت نہ مانگیں ، کیونکہ یہ بند ہر ایک کے فائدے کیلئے ہے ۔

اس دوران کرناٹک کے ایک شہر میں لوگوں نے منفرد فیصلہ کیا ہے۔ ہاسن ضلع کے چن رائن پٹن میں لوگوں نے 14 دنوں تک رضا کارانہ طور پر بند منانے کا اعلان کیا ہے ۔ یہاں آج  مقامی تحصیلدار، عوامی نمائندوں اور تاجروں کی میٹنگ ہوئی ۔ تمام نے ملکر 5 جولائی سے 14 دنوں تک رضاکارانہ طور پر لاک ڈاؤن کرنے کا فیصلہ کیا ہے ۔ ہفتہ میں صرف 3 دن صبح 6:30 تا  11:30 بجے تک ہی اشیائے ضروریہ کی دکانیں کھلی رکھنے پر اتفاق کیا ہے ۔

ایک نظر اس پر بھی

کرناٹک: ایس ایس ایل سی میں تقریبا 6 لاکھ طلبہ کامیاب

کورونا کی خطرناک وبا کے درمیان ریاست کرناٹک میں منعقد ہوئے ایس ایس ایل سی ( دسویں جماعت) کے نتائج منظر عام پر آچکے ہیں ۔ تقریبا 6 لاکھ طلبہ نے ان امتحانات میں کامیابی حاصل کی ہے ۔ طلبہ کی ہمت اور حوصلہ کی ہر جانب سے ستائش کی جارہی ہے ۔

کاروار:ایس ایس ایل سی امتحان کے نتائج۔ سرسی کی سنّدھی ہیگڈے نے پایا ریاست میں پہلا رینک

امسال ریاست میں ایس ایس ایل سی کے جو امتحانات ہوئے تھے اس کا سامنا طلبہ نے کووڈ وباء کے پس منظر میں ذہنی تناؤ کے ساتھ کیا تھا۔اس کے بعد کافی دنوں سے طلبہ بڑی بے چینی کے ساتھ اپنے نتائج کا انتظار کررہے تھے۔

کرناٹک میں 5985 کورونا پوزیٹیو، 107 ہلاک

ریاست کرناٹک میں پچھلے 24 ؍ گھنٹوں میں 5985 افراد کورونا میں مبتلا ہوئے ہیں، 107 کی موت ہوگئی، متاترین کی کل تعداد 1،78،087 ہوگئی، جبکہ 4،670 افراد شفایاب ہو کر اسپتالوں سے رخصت ہوئے ہیں۔ 107 افراد ہلاک ہوئے ، مہلوکین کی کل تعداد 3،198 ہوگئی ہے۔

کرناٹک میں آئندہ 5دنوں اوربنگلورمیں دوروزتک شدیدبارش کی پیشین گوئی، ریاست میں شدیدبارش اورسیلاب سے 100 سڑکوں اورپلوں کونقصان

ریاست بھرمیں پچھلے چنددنوں سے موسلا دھار بارشوں کا سلسلہ جاری ہے۔شدیدبارش اورسیلاب سے ریاست کے کم از کم 100 سڑکیں اورپلوں کونقصان پہنچاہے۔ اس سلسلہ میں محکمہ تعمیرات عامہ (پی ڈبلیوڈی)کے افسروں نے معلومات فراہم کرتے ہوئے کہا کہ گزشتہ تین دنوں سے ریاست میں بھاری بارشیں ہورہی ...