کرناٹک میں کورونا متاثرین کی تعدا د 500کے پار؛ بنگلور میں ایک صحافی متاثر ہونے سے 70 صحافیوں کو کورنٹائن کا خدشہ
بنگلورو،26؍اپریل(ایس او نیوز) کرناٹک میں کورونا کے معاملات میں روز بروز اضافہ ہورہا ہے ہفتہ کے روز ریاست میں کورونا وائرس کے 26نئے معاملہ سامنے آنے کے ساتھ ہی ریاست میں متاثرین کی تعداد 500 کو پار کرگئی ہے۔ پچھلے دودنوں سے کرناٹک میں روزانہ 25سے زائد معاملات سامنے آ رہے ہیں۔ کرناٹک میں جہاں متاثرین کی تعداد 500سے متجاوز ہو گئی اسی طرح مہلوکین کی تعداد 18ہے جبکہ صحت یاب ہونے والوں کی تعداد 158ہو گئی ہے۔ باقی 324متاثرین مختلف اسپتالوں میں زیر علاج ہیں۔ ان میں سے 7متاثرین ایسے ہیں جن کا علاج آئی سی یو میں چل رہا ہے۔ بنگلورو میں ایک کنڑا نیوز چینل کے ایک صحافی میں بھی کورونا وائرس کی تشخیص ہوئی ہے جس کے ساتھ ہی دیگر 70 صحافیوں کو بھی کورنٹائن میں بھیجنے کا خدشہ ہے۔
بنگلورومیں جہاں اس ہفتہ کے اوائل میں متاثرین کی تعداد نہ ہونے کے برابر تھی اب اس میں اچانک اضافہ ہو چکا ہے۔ شہر کے ہونگا سندرا وارڈ میں کووڈ۔19سے متاثر ایک بہاری مزدور کے ربط میں آنے والے مزید 5؍افراد میں کورونا وائرس پازیٹیو پائے گئے۔ اس کے علاوہ بنگلورو میں جملہ 13نئے معاملات سامنے آئے جس کے نتیجے میں بنگلورو میں متاثرین کی تعداد 133 تک پہنچ گئی جن میں سے 4کی موت ہو چکی ہے۔
ملک میں کورونا سے اب تک775کی موت ملک میں کرونا وائرس کی وجہ مرنے والے لوگوں کی تعداد بڑھ کر 775 ہو گئی اور مریضوں کی تعداد 24,506 پر پہنچ گئی-مرکزی وزارت صحت کے مطابق ابھی کورونا وائرس کا علاج کرا رہے لوگوں کی تعداد 18,668 ہے جبکہ 5,062 لوگ صحت مند ہو چکے ہیں اور انہیں اسپتال سے چھٹی دے دی گئی ہے اور ایک مریض ملک چھوڑ کر چلا گیا ہے-متاثرہ افراد کی کل تعداد میں 77غیر ملکی شہری بھی شامل ہیں -جمعہ کی شام سے لے کر اب تک52لوگوں کی موت ہوئی ہے- ان میں سے 18 افراد مہاراشٹر میں، 15 کی گجرات، نو کی مدھیہ پردیش، تین تین لوگوں کی دہلی اور مغربی بنگال، دو افراد تمل ناڈو اور ایک ایک شخص کی موت پنجاب اور اتر پردیش میں ہوئی-اس متعدی بیماری سے اب تک کل 775 لوگوں کی موت ہوئی ہے جن میں سے سب سے زیادہ 301 لوگوں کی موت مہاراشٹر میں، گجرات میں 127، مدھیہ پردیش میں 92، دہلی میں 53، آندھرا پردیش میں 29، راجستھان میں 27 اور تلنگانہ میں 26 لوگوں کی موت ہوئی- اتر پردیش میں 25، تمل ناڈو میں 22 جبکہ کرناٹک اور مغربی بنگال میں 18-18 لوگوں کی موت ہوئی ہے-پنجاب میں ابھی تک 17 لوگوں نے دم توڑا ہے- جموں و کشمیر میں پانچ افراد نے جان گنوائی جبکہ کیرالہ، جھارکھنڈ اور ہریانہ میں تین تین لوگوں نے جان گنوائی-وزارت کے اعداد و شمار کے مطابق بہار میں دو لوگوں کی موت ہوئی جبکہ میگھالیہ،ہماچل پردیش، اڑیسہ اور آسام میں ایک ایک شخص کی موت ہوئی- مرکزی وزارت صحت کے جاری اعداد و شمار کے مطابق ملک میں انفیکشن کے سب سے زیادہ 6,817 کیس مہاراشٹر سے سامنے آئے- اس کے بعد گجرات سے 2,815، دہلی سے 2,514، راجستھان سے 2,034، مدھیہ پردیش سے 1,852 اور تمل ناڈو سے 1,755 معاملے سامنے آئے-اتر پردیش میں 1,621، تلنگانہ میں 984 اور آندھرا پردیش میں 955 ہو گئے ہیں -مغربی بنگال میں کرونا وائرس کے مریضوں کی 571، کرناٹک میں 474، جموں و کشمیر میں 454، کیرالہ میں 450، پنجاب میں 298 اور ہریانہ میں 272 ہو گئی ہے- بہار میں کرونا وائرس کے 233 کیس سامنے آئے ہیں جبکہ اڑیسہ میں 94 کیس سامنے آئے- جھارکھنڈ میں 57 لوگ متاثر پائے گئے ہیں اور اتراکھنڈ میں انفیکشن کے 48 کیس سامنے آئے ہیں -ہماچل پردیش میں انفیکشن کے ابھی تک 40 کیس سامنے آئے ہیں، چھتیس گڑھ اور آسام میں 36-36 کی تصدیق ہوئی ہے-چندی گڑھ اور انڈمان اور نیکوبار جزائر میں کرونا وائرس کے 27 کیس سامنے آئے جبکہ لداخ میں 20 افراد متاثر پائے گئے-میگھالیہ میں 12 کیس سامنے آئے اور گوا اور پڈوچیری سے سات سات معاملے سامنے آئے-منی پور اور تریپورہ میں دو دو افراد متاثر پائے گئے جبکہ میزورم اور اروناچل پردیش میں ایک ایک معاملہ سامنے آیا- |
بیلگاوی کے ہیرے باگے واڑی میں کورونا وائرس سے متاثر9؍افراد کی نشاندہی کی گئی ہے۔ دکشن کنڑا میں روزانہ ایک نئے معاملے کا سلسلہ برقرار ہے۔ ہفتہ کے روز بھی اس ضلع میں ایک نیا معاملہ سامنے آیا۔
میسورو کے ننجن گڈھ اور چکبالا پور میں ایک ایک معاملہ سامنے آیا ہے گدگ ضلع جہاں سے کافی عرصے سے کوئی معاملہ سامنے نہیں آیا اب اس ضلع سے ایک اور معاملے کی اطلاع ملی ہے۔
ٹمکورو اور گدگ میں ایک ایک معاملہ سامنے آنے سے ریاست میں ان اضلاع کی فہرست میں سے دو نام کٹ گئے ہیں جن کو گرین زون قرار دیا گیا تھااور وہاں گزشتہ دو ہفتوں سے کوئی نیا معاملہ سامنے نہیں آیا۔
بنگلورو کے 133متاثرین میں سے 4کی موت ہو گئی ہے 49صحت یاب ہو گئے جبکہ دیگر 80زیر علاج ہیں۔ میسورو سے 89معاملہ سامنے آئے جن میں سے 34صحت یاب ہو چکے ہیں اور باقی 55زیر علاج ہیں۔ بیلگاوی میں 54متاثرین ہیں جن میں سے 4صحت یاب ہوئے ایک کی مو ت ہو گئی اور دیگر 49زیر علاج ہیں۔
وجئے پورا میں 39معاملے سامنے آئے ہیں ان میں سے 2کی موت ہوئی اور باقی تمام 37زیر علاج ہیں۔ دیگر اضلاع باگلکوٹ میں 24،چکبالاپو ر میں 18دکشن کنڑا میں 17، منڈیا میں 16بیدر میں 15، بلاری میں 13، بنگلورو رورل میں 12،اتر کنڑا میں 11، دھارواڑمیں 9، گدگ میں 4، اڈپی میں 3، ٹمکورو میں 3، داونگیرے میں 2، چتردرگہ میں 1اور کورگ میں ایک معاملہ سامنے آیا ہے۔ بعض اضلاع میں ان متاثرین کا علاج بھی ہو چکا ہے-
بنگلورو میں ایک صحافی متاثر ہونے سے چنداینکر سمیت 70صحافیوں کے کوارنٹائن کا اندیشہ : کرناٹک کے دارالحکومت بنگلورو میں کنڑ انیوز ٹیلی ویژن چینل کے ایک صحافی میں کورونا وائرس (کووڈ۔19) کی تشخیص ہوئی ہے۔ سرکار ذرائع کے مطابق نیوز چینل میں بطور کیمرہ مین اس صحافی نے حکومت کے ذریعہ خصوصی اسپتال میں جانچ کرائی تھی جس میں اس کی رپورٹ مثبت پائے جانے کے فوراً بعد وکٹوریہ اسپتال میں داخل کرادیا گیا۔
ذرائع سے ملی اطلاع کے مطابق ہفتہ کے روز بنگلورو کے اندرا نگر علاقے میں آنے والے سی وی رامن اسپتال میں صحافیوں کا کووڈ کی جانچ کا سلسلہ جاری رہا۔ پہلے روز 297 صحافیوں نے جمعہ کے روز اس جانچ میں حصہ لیا۔ اس کے بعد ہفتہ کے روز بھی بنگلورو کے بڑے اخبارات اور ٹی وی چینلوں کے نمائندوں نے کووڈ ٹسٹ میں حصہ لیا۔ اس دوران یہ بات سامنے اآئی ہے کہ جس نیوز 18کیمرہ مین کو کورونا وائرس سے متاثر پایا گیا ہے اس کے رابطہ میں آنے والے 35سے زائد صحافیوں کو ہوم کورانٹائن کر دیا گیا ہے۔
بتایا جاتا ہے کہ متاثرہ کیمرہ مین کے ساتھ مختلف مواقع پرموجود رہنے والے ٹی وی۔9، پبلک ٹی وی، سورنا ٹی وی، بی ٹی وی، دگ وجئے ٹی وی کے صحافیوں اور کیمرہ مینوں کو بھی کوارنٹائن کرنے پر غور کیا جارہا ہے۔
بتایا جاتا ہے کہ متاثرہ کیمرہ مین کے راست رابطہ میں آنے والے 70/ افراد کی نشاندہی کی گئی ہے جن کو کوارنٹائن کیا جاسکتا ہے۔ چند رپورٹرس اور ٹی وی اینکروں کو بھی کوارنٹائن کیا جاسکتا ہے۔