نئی دہلی، 8/مئی (ایس او نیوز/یواین آئی) ملک میں کورونا وائرس 'کووڈ -19' سے متاثرین کی تعداد 50 ہزار سے تجاوز کر نے کے بیچ دہلی میں واقع آل انڈیا انسٹی ٹیوٹ آف میڈیکل سائنسز(ایمس) کے ڈائرکٹر رندیپ گلیریا نے کہا ہے کہ کورونا کا انفیکشن یہاں جون- جولائی میں اپنے عروج پر ہوگا -

ڈاکٹر گلیریا نے جمعرات کو میڈیا سے بات چیت میں کہاکہ اگلے دو ماہ جون-جولائی میں ملک میں کورونا وائرس کا انفیکشن اپنے عروج پر ہوگا-ملک میں کورونا وائرس انفیکشن کے فی الحال 52952 معاملے سامنے آ ئے ہیں اور 1783 / افراداس وائرس کے سبب دم توڑ چکے ہیں -

ڈائرکٹر نے کہا کہ کورونا وائرس سے بچاؤ فی الحال احتیاط ہی ہے - احتیاط برتنے کے ساتھ ہی سماجی فاصلے اور لاک ڈاؤن جیسے قدم اس پھیلاؤ کو روکنے میں مددگار ہیں - انہوں نے کہا کہ کورونا مریضوں کی تعداد بڑھنے کے ساتھ ہی انفیکشن کا پتہ لگانے کے لئے جانچ میں بھی اضافہ ہوا ہے -

گلیریا نے کہا کہ جون کے مہینے میں کورونا وائرس کے کیس سب سے زیادہ ہوں گے، ساتھ ہی انہوں نے کہا کہ لاک ڈاؤن کا فائدہ ملا ہے اور لاک ڈاؤن میں کورونا وائرس کے معاملے زیادہ نہیں بڑھے ہیں-

انہوں نے کہا کہ ملک میں کورونا وائرس کی جو صورتحال ہے اس کے پیش نظر جون-جولائی میں اس کے عروج پر رہنے کا اندازہ ہے -

ڈائرکٹر نے ساتھ ہی یہ بھی کہا کہ یہ بیماری ایک بار میں ختم نہیں ہوگی - ڈاکٹر گلیریا نے کہاکہ ہمیں کورونا وائرس کے ساتھ رہنے کی عادت ڈالنی ہوگی اور وائرس کے معاملے آہستہ آہستہ کم ہوں گے -